EINIG: Prost i Sogn, Kjetil Netland, stiller seg bak biskopen i Bjørgvin.
Foto: Noralv Pedersen / NRKFleire reagerte då NRK fortalde om formuleringa i Bjørgvin bispedøme si stillingsannonse til soknepreststillinga i Nordfjord.
Setninga «opplysningar om samlivsform vil kunna verte innhenta og vektlagde ved tilsetting» blei tolka som diskriminerande mot homofile og dei prestane som ikkje er gift. Biskop i Bjørgvin bispedøme, Halvor Nordhaug, meinte derimot at dei har lov til å formulere seg slik i annonsen.
Prost i Sogn, Kjetil Netland, stiller seg bak biskopen.
– Eg kan forstå at det blir oppfatta slik, men den er ikkje meint slik. Vi er ei kyrkje – eit trussamfunn – og ikkje ein offentleg etat som andre etatar. Me står for noko og vil formidle det. Då må vi kunne spørje om det, sånn at det blir klargjort for arbeidsgjevar.
- Les også:
– Eg tykkjer det er trist
Prest i Lærdal, Helene Langeland, er sjølv skilt og har no ein ny sambuar. Ho trur ikkje det er vits for ho å søkje ny jobb i Bjørgvin bispedøme slik stillingsannonsane er formulert no.
Ho meiner ein burde legge større vekt på det faglege, framfor det personlege.
– Eg meiner at det er utdanninga mi som skal kvalifisere meg, om eg blir sett på som ein dyktig prest eller ikkje. Då skulle det at eg er sambuar ikkje vere noko negativt. Eg tykkjer det er trist at bispedøme vil sjå på det som negativt, fortel ho.
ANNONSEN: Stillingsannonsen til Bjørgvin bispedøme var tydeleg i sine kriteria.
Foto: Illustrasjon– Meir enn tal og karakterar
Langeland får derimot ikkje mykje støtte frå sine kollegaer.
Sokneprest i Luster, Geir Paulsen, meiner det ikkje er ein prest sin CV som skal vege tyngst.
– Ein prest blir ikkje berre tilsett basert på utdanning, praksis, tal og karakterar. Om ein er personleg egna er ein særdeles viktig faktor i tilsettinga av ein prest, seier han.
Langeland meiner ein mister mykje verdifull kompetanse når annonseteksten er formulert slik den er i dag.
– Eg veit om mange prestar som kunne vurdert å søkje på Vestlandet, men veit at det tradisjonelt er ein så konservativ plass, at det ikkje er aktuelt for dei å vurdere, fortel ho.
