Meiner Oslo må tappast om Vestlandet skal bli eitt fylke

I dag startar forhandlingane mellom Hordaland, Rogaland og Sogn og Fjordane om fylka skal slå seg saman. Ein Vestlandsregion kan få over ein million innbyggjarar.

Fleire politikarar vil ha statlege jobbar ut av Oslo for å smørje reforma.

– Skal vi byggje sterkare regionar i landet må noko av det staten gir tilbake vere at det enorme byråkratiet i Oslo-gryta er villig til å gje frå seg og flytte kompetansemiljø ut i landet, seier Eid-ordførar Alfred Bjørlo (V).

• Les også: Krev fylkesmannsembetet i ny Vestlandsregion
• Les også: Fylkesmannen sine 135 arbeidsplassar er i spel

Ber staten bidra

Viktige arbeidsplassar står på spel i forhandlingane. Eit vedtak om ny Vestlandsregion kan kome i oktober, men først må politikarane bli samde om kvar arbeidsplassane skal ligge.

Bjørlo meiner staten bør bidra gjennom å flytte statlege arbeidsplassar frå Oslo til Vestlandet.

– Hovudstaden kokar over på bustadmarknaden, på trafikk og alt som er. Dette er tida for å bruke kompetansemiljøa og sterke regionar som Nordfjord der næringslivet går som det susar. Vi har kapasitet til å ta imot fleire folk og nye arbeidsplassar.

• Les også: Regionmeldinga eit vonbrot for Følling
• Les også: Slik kan det nye regionkartet sjå ut

Krev at Sogn og Fjordane får sin del

Stortinget har bedt fylkeskommunane om å vurdere samanslåing. Samtidig har samarbeidspartia på Stortinget blitt samde om å flytte ut fleire statlege arbeidsplassar frå Oslo.

Fylkesordførar i Sogn og Fjordane, Jenny Følling (Sp), ser gjerne at staten tek skikkeleg i for å smørje arbeidet med ein ny storregion dominert av byane Bergen og Stavanger.

– Når dei har mål om at det skal flyttast ut statlege arbeidsplassar vil det også vere eit viktig tema at ein får flytta arbeidsplassar til Sogn og Fjordane for å balansere arbeidsmarknaden.

• Les også: – Utan oppgåver er dette lite interessant

– Må få noko som monnar

Fleire ordførarar er samde i kravet.

Jan Geir Solheim (Sp) i Lærdal og Frida Melvær (H) i Askvoll fryktar regionreforma vil føre til at viktige jobbar forsvinn frå distrikta om ikkje staten kompenserer.

– Skal reforma verke må staten vere på tilbodssida, vi må få noko som monnar.

Lovar utflytting

Statssekretær i Kommunal- og moderniseringsdepartementet, Kristin Holm Jensen (H) lovar utflytting, men vil ikkje seie kor mykje hovudstaden må blø.

– Om vi bygger sterkare regionar og sterkare kompetansemiljø er det lagt godt til rette for at ein kan ta ansvar for fleire statlege oppgåver.

– Korleis skal ein forklare for Oslo-veljarane at ein flyttar ut eit stort tal arbeidsplassar frå hovudstaden?

– Først og fremst treng vi å løyse nye oppgåver i staten. I samband med det ser vi alltid på moglegheita for å lokalisere desse utanfor Oslo. Så er det endringar og omstilling i offentleg sektor som i samfunnet elles, det må vi vere innstilt på også i framtida.