NRK Meny
Normal

Politikar på jobb for avis intervjua partifelle

Norsk journalistlag og Norsk Presseforbund reagerer på at ein kommunestyrerepresentant intervjua sin eigen ordførar og partikollega på jobb for Fjordingen.

Skjermdump frå Fjordingen om traseval Strynefjellet

VEGKONFERANSE: Det var i denne saka frå vegkonferansen i Geiranger at kommunestyrerepresentant Inge Fænn intervjua sin partikollega for Fjordingen.

Foto: Skjermdump / fjordingen.no

Kjersti Løken Stavrum, generalsekretær i Norsk Presseforbund

TILBAKELAGT: Stavrum meiner det å kombinere politikk og journalistikk er eit tilbakelagt stadium i norsk presse.

Foto: Kallestad, Gorm / NTB scanpix

– På dette området er Vær Varsom plakaten veldig klar. Redaktørar og journalistar må passe på sjølvstendet og unngå dobbeltroller eller andre bindingar som gjer at ein kan spekulere rundt habiliteten deira, seier generalsekretær for Norsk Presseforbund, Kjersti Løken Stavrum.

Måndag publiserte Fjordingen fleire saker frå vegmøtet der vegvesenet presenterte sine planar for Strynefjellet. Ei av sakene vart skrive av høgrepolitikar Inge Fænn, som er tidlegare journalist og redaktør i avisa. Stavrum meiner blandinga av politikk og journalistikk er ugrei.

– Det å vere aktiv politikar og journalist er eit tilbakelagt stadium i norsk presse. Det er ein klar fordel for lesarane, som slepp å lure på om dei les journalistikk eller skjult politikk.

– Ikkje politisk møte

Inge Fænn

IKKJE NYTT: Fænn seier at det er mange før han som har kombinert journalistikk og politikk og ser ikkje på det som noko stort problem.

Foto: Kjell Arvid Stølen / NRK

Etter mange år som journalist og redaktør i Fjordingen sit Fænn no i kommunestyret for Høgre i Stryn. På møtet i Geiranger intervjua han mellom andre stryneordførar og partifelle Sven Flo. Han ser ikkje noko problem med det.

– Det var ikkje eit politisk møte, det var framlegging av to rapportar. De lagar eit nummer ut av at eg snakka med ordføraren, men eg snakka med tre ordførarar og berre ein av dei var frå Høgre. Det å kombinere politikk og journalistikk er det mange som har gjort før meg, seier Fænn.

– Uproblematisk

Vegmøtet Fænn dekka for Fjordingen vart arrangert i regi av organisasjonen Gode Vegar AS. På møtet var ordførarane i kommunane rundt Strynefjellet, Stryn, Stranda og Skjåk. Trass kritikken frå journalistlaget og presseforbundet ser redaktør i Fjordingen, Bengt Flaten, på saka som uproblematisk.

– Det var ikkje eit politisk møte og han var ikkje der som politikar. Det er sjølvsagt uaktuelt for oss å nytte han til å skrive politiske saker om Stryn, men eg ser ikkje noko problem i denne saka. Det at han er politikar kan ikkje hindre han i å dekke samfunnsaktuelle spørsmål.

Redaktør for Fjordingen

UPROBLEMATISK: Flaten meiner det er uproblematisk at Fænn kombinerer det å skrive for Fjordingen med å vere kommunepolitikar.

Foto: Erlend Blaalid Oldeide / NRK

Flaten presiserer at han heilt klart meiner at Fjordingen skal vere uavhengig, men trur ikkje dette vil skade truverdet til avisa.

– Det er sikkert nokon som vil problematisere at han intervjuar ordføraren. Det er greitt og kunne sikkert vore ugjort. Avisa skal sjølvsagt vere uavhengig, men eg trur ikkje dette vil skade truverdet vår.

– Lesarane avgjer

Svein Rune Kjøllesdal

LESAREN: Kjøllesdal seier det er opp til lesarane å bestemme om ein journalist er inhabil eller ikkje.

Foto: Sondre Lingås Haukedal / NRK

Fylkesleiar for Norsk Journalistlag, Svein Rune Kjøllesdal, er samd med Stavrum i at det er uheldig når politikarar intervjuar partifellar.

– Det er fint at Flaten her seier at det ikkje er snakk om bindingar i denne saka, men til sjuande og sist er det opp til lesarane å bestemme om ein journalist er uavhengige. Det å vere lokalpolitikar gir ein slike bindingar i mange saker.

Statens helsetilsyn har avdekka at fire av fem norske kommunar som blei sjekka bryt lova og gir eit for dårleg tilbod til utviklingshemma.
Første i Norge som har vektløfting som valgfag.