Politiet: Fylkestopp brukte offentlege midlar på fotballklubb

Den tidlegare fylkestoppen sin advokat, Stig Nybø, karakteriserer den alvorlege tiltalen som «hinsides».

– Han har heile tida vedgått å ha gått utanfor sine fullmakter for eit beløp på om lag 150.000 kroner. Dette er noko heilt anna enn tiltalen som er heilt «hinsides» all sunn fornuft, seier Nybø.

– Den tidlegare sjefen i fylkeskommunen blir skulda for å ha lånt vekk mykje av utstyret han kjøpte inn på fylkeskommunen si rekning. Kva kommentar har du til det?

– Dels er utstyret teke i bruk der det skal brukast, dels er det lagra. Det som var lånt ut er bagatellmessige ting. Forutan at han har brukt 150.000 utan rettmessige fullmakter, vil vi krevje frifinning, seier Nybø.

Gåvekort, dronar og champagnekjølar

Ifølgje tiltalen skal den tidlegare fylkestoppen ha kjøpt inn datautstyr, film- og lydutstyr, gåvekort, verktøy, dronar, trenings- og friluftsutstyr, byggematerialer, mobiltelefonar, champagnekjølarar og røykmaskin for til saman 3,7 millionar kroner.

Utstyret vart betalt av fylkeskommunen ved at vedkomande bestilte det i fylkeskommunen sitt namn og at fakturaene vart sende dit. Ein del av utstyret skal ifølgje tiltalen vere brukt til private føremål. Resten av utstyret skal ifølgje politiadvokat Magnus Engh-Juel ha vore brukt av ein lokal fotballklubb.

– Fotballklubben har mellom anna brukt lyd- og filmutstyr, utstyr for å streame på internett og kommunikasjonsutstyr som har vore kjøpt inn på fylkeskommunen si rekning, seier han.

• LES OGSÅ: Mistenkjer tilsett for økonomisk utruskap
• LES OGSÅ: Fekk sparken - sikta for grov økonomisk utruskap

Fotball-toppar og fylkesrådmannen må i vitneboksen

Det var rett før jul i 2014 at fylkesrådmann Tore Eriksen fekk mistanke om at den tidlegare leiaren hadde gjort seg skuldig i økonomisk utruskap. Han vart suspendert, før han til slutt fekk sparken.

Rettssaka tek til ved Fjordane tingrett i Førde den 14. juni. Det er kalla inn 40 vitne. Sentrale personar i den lokale fotballklubben står på vitnelista. Det same gjer fylkesrådmann Tore Eriksen og fleire noverande og tidlegare tilsette i fyllkeskommunen. Det er sett av 15 dagar til rettssaka. Strafferamma for grov økonomisk utruskap er seks års fengsel.