Via ei rekkje ulike norske nettbutikkar dreiv «dopingmafiaen» import, produksjon og sal av alt frå anabole steroid til viagra.
I så store mengder at ein aldri har sett liknande i Noreg og til ein verdi på over 30 millionar kroner.
– Vi kan samanlikne det med eit kjøpesenter, der mange butikkar sel ulike variantar av dei ulike produkta, seier statsadvokat Trond Høvik.
Opererte på nettforum
Han er overtydd om at sju menn som dei neste vekene og månadane skal sitje i Bergen tingrett var heilt sentrale i eit kriminelt nettverk, som i stor grad opererte via internett. Politiet kallar sjølv etterforskinga og aksjonane for operasjon «Hush», oppkalla etter nettforumet Hushboard.
To menn frå Sunnfjord blir av politiet rekna som hovudmenn, medan tre menn frå Buskerud og to menn frå Bergen har hatt sentrale, men ikkje så viktige roller.
I retten kunne politioverbetjent Askel Rødland i dag syne fram meir av dei store beslaga politiet gjorde hausten 2015 og vinteren 2016. Det aller meste pakka inn i det som ser ut som legale legemiddel, anten som piller eller flytande væske.
Bilseljar nektar all skuld
Rødland leia etterforskinga i fleire år, men utover ein pressekonferanse i fjor haust har han ikkje uttalt seg til media. I retten heldt han seg strikt til fakta om blant anna skilnaden på doping innan idretten og i kriminelle miljø.
Men sjølv om politi og påtalemakt er overtydde om at det er mafiaverksemd dei sju mennene dreiv med i fleire år, er dei tiltalte og forsvararane deira av ei heilt anna oppfatning. Ein av dei tiltalte, ein bilseljar frå Bergen, nektar all skuld.
– Han har vore varetektsfengsla i åtte månader, han har vore i fleire politiavhøyr og han har gjeve ei forklaring til politiet der han nektar kjennskap til denne såkalla «Improved Shop», seier advokat Stein Erik Ottesen.
– Tøff periode
Han avviser på det sterkaste at hans klient er ein del av eit mafianettverk.
– Det har vore ein tøff periode. Først med varetekt og økonomiske utfordringar. I ettertid har det vore tøft å gå å vente på at denne saka skulle kome opp. Det har gått lang, lang tid, seier Ottesen.
Han er den einaste av dei sju tiltalte som nektar for alt. Den andre bergensaren og dei to sunnfjordingane innrømmer delvis straffskuld, medan tre menn frå Buskerud har lagt alle korta på bordet.
– For min klient vil denne saka først og fremst handle om straffeutmålinga, sa advokaten til den eine av «Buskerud-gjengen», Hilde Marie Ims i retten tysdag.
Sju tiltalte for retten
Ei svært omfattande etterforsking avslørte det største nettverket for produksjon og sal av dopingmiddel i Noreg. Politiet meiner at dopingsal via internett skaffa nettverket inntekter på over 30 millionar kroner.
- Tiltalt nummer 1Mann (36) frå Sunnfjord
Mannen frå Sogn og Fjordane blir rekna som ein av hovudmennene i saka. Han blei arrestert i Russland i 2016 og sat fengsla der i eit år før han blei utlevert til norsk politi.
- Tiltalt nummer 2Mann (37) frå Sunnfjord
Sunnfjording busett i Bergen og ein av hovudmennene bak dopingnettverket, meiner politiet. Saman med tiltalt nummer ein skal han ha selt dopingmiddel med til saman 78 millionar mikrogram virkestoff.
- Tiltalt nummer 3Mann (30) frå Bergen
Skal ha oppbevart og selt store mengder dopingmiddel via internett frå Bergen. Saman med tiltalt nummer 4 skal han også ha smulga doping frå Sverige til Noreg.
- Tiltalt nummer 4Mann (30) frå Bergen
Tiltalt for frakt, oppbevaring og sal av store mengder dopingmiddel. Blant anna skal han ha oppbevart dopingmiddel heime.
- Tiltalt nummer 5Mann (29) frå Buskerud
Tiltalt for å ha oppbevart og selt dopingmiddel frå eit lager i Buskerud. Han har lagt alle korta på bordet og har tilstått.
- Tiltalt nummer 6Mann (34) frå Buskerud
Ein av mennene som blant anna skal ha bidratt med oppbevaring og sal av dopingmiddel over internett. Knytta til lageret i Buskerud.
- Tiltalt nummer 7Mann (28) frå Buskerud
Skal ha bidratt til oppbevaring og sal av store mengder dopingmiddel. Som dei andre tiltalte skal han også sjølv ha brukt dopingmiddel.
- Tiltalt nummer 8Mann (46) frå Sunnfjord
Har ikkje møtt i retten enda. Skal ha vore sentral i organiseringa av transport av dopingmiddel.
- Tiltalt nummer 9Mann (61) frå Østfold
Har ikkje møtt i retten enda. Skal ha transport store mengder dopingmiddel frå Bergen til Austlandet og frå Sverige til Noreg.
Den største dopingsaka i Noreg
Måndag 21. januar møter sju menn frå Hordaland, Sogn og Fjordane og Buskerud i ein av dei største rettssakene om dopingmiddel i Noreg nokon gong.