Fleire narkotiske stoff, mellom anna ecstasy, amfetamin og hasj blei beslaglagt under aksjonen. Ein større pengesum som politiet meiner stammar frå narkotikahandel blei også beslaglagt.
Politiet fekk tips om at ecstasy blei nytta i eit miljø i Førde, og aksjonerte på ei adresse i slutten av oktober.
– Seks eller sju personar blei arresterte der og då, og etterforsking førte til fleire pågripingar, seier Dag Fiske som er lensmann i Førde og Naustdal.
Politiet tok med seg mellom 70 og 80 tablettar med ecstasy og 20 gram hasj.
Prøvar påviste amfetamin hjå dei fleste på festen, men dei arresterte hadde brukt opp stoffet, og politiet fann ikkje noko å beslaglegge.
- Les også:
Velkjend av politiet
Éin har blitt varetektsfengsla i saka. Det er ein lokal mann og var godt kjend av politiet.
Fiske meiner mannen har hatt ei rolle i å bringe narkotikaen til Sunnfjord, mest sannsynleg frå Austlandet.
– Det er ei veke att av varetektsfengslinga, men me vurderar å be om lengre fengsling på grunn av at vi framleis hentar inn bevis i saka, seier Fiske.
Elles lite brukt stoff
Ecstasy er eit narkotikum som var vanleg i festmiljøa på 90-talet og fram til byrjinga av 2000-talet.
– Stoffet var mykje i omløp tidlegare, men forsvann for nokre år sidan frå distriktet. Men det siste halvåret har det dukka opp att, seier Fiske.
– Berre éin til tre prosent av ungdom i Noreg har prøvd ecstasy, og endå færre enn dei har fått problem av bruken, seier Harald Munkvold som er ruskoordinator i Helse Førde.
Munkvold har lenge jobba med rusmisbrukarar, og meiner ecstasybruken er svært låg, spesielt hjå ungdom.
– Stoffet blei brukt i partymiljøet rundt tusenårsskiftet, men blir i dag brukt svært lite.
– Når eg skulle fortelje om ecstasy måtte eg snakke med kollegaer og leite lenge etter saker og verknadar, fordi det er veldig lite brukt her i fylket, seier Munkvold.
Stogga innfarten av stoffet
– Me trur at det var eitt enkelt ledd som har innført narkotikaen, og me håpar at me no har stogga dette, seier Dag Fiske.
Han fortel at politiet har hatt fleire bekymringssamtalar med foreldre til ungdom dei ser vankar i miljø som det dei aksjonerte mot i oktober.
– Me er redde for at yngre ungdom skal lokkast inn i miljøet, seier Fiske.
I pillene dei beslagla fann dei forskjellige verkestoff, så det er ikkje lett å vite kva ungdommane fekk i seg.
– Ecstasy kan få ganske alvorlege biverknadar, mellom anna psykose og liknande, seier Fiske.
Politiet held fram med etterforskinga, og veit enno ikkje kva tid saka vert løyst.