– Både ambulanse, politi og brannvesen er framme på staden der ulukka har skjedd, og to av dei som var i bilane seier at dei har vondt i høvesvis brystet og handa, seier operasjonsleiar Tatjana Knappen i Vest politidistrikt.
Det var to personar i kvar av bilane, og alle har blitt sett til av ein lege. Legen har konkludert med at det er tale om lettare skadar.
Ulukka har skjedd på ein strekning med 70-sone på E39 gjennom Jølster som heiter Flaten.
Politiet seier at kollisjonsputene er utløyst i begge bilane, og ingen av dei går an å køyre vidare.
Veldig glatt på vegen
Innsatsleiar i politiet Joachim Malterud seier til NRK på staden der trafikkulukka har skjedd at vegen er veldig glatt.
– Det har snødd ganske tett, og det ligg eit veldig glatt lag med sørpe på vegen, så det er framleis utfordrande, seier han.
Første nyttårsdag er ein dag med mykje trafikk på vegane, og politiet ber folk ta omsyn til dei krevjande køyreforholda. Det kan nemleg vere likande køyreforhold andre stader og.
– Det gjeld å ta det med ro, og heller kome litt seint men trygt fram. Er du i tvil, så senk farten, seier Malterud.