Både store og små bilar har fått problem på den halvannan kilometer lange strekka etter Tylden bru i retning Sogndal.
– Det er heilt eksepsjonelt. Eg har aldri opplevd så glatt veg før, seier Frode Henden som køyrde frå Førde til Sogndal i ettermiddag.
Klarde ikkje fote seg
Henden fortel at føret elles gjennom Sogndalsdalen var bra. Han seier glatta det siste stykket ned mot Sogndal kjem brått på. Henden trur kombinasjonen snøfall, salting og stor trafikk er årsaka til problema i Sogndalsdalen.
- LES OGSÅ: Vakna opp til 50 centimeter nysnø
- LES OGSÅ: Bilar på tvers sperra fleire vegar
– Det er rett og slett så glatt at folk gjekk i grøfta. Dei klarde ikkje å fote seg på vegen, seier han.
Ein semitrailer skal ha sklidd sidelengs ut i grøfta, slik at trekkvogna stod fast i grøfta og hengaren på «halv åtte» ut i vegen.
Stengde veg
– Personbilar klarer å komme igjennom, men store køyrety vil ikkje komme seg forbi. Her trur eg ein treng dirigering ganske fort. Alle som står fast treng kjettingar/hjelp for å komme seg vidare, fortel Henden.
Ein periode var vegen heilt stengd på grunn av bilberging.
Politiet rykte ut
Entreprenør har også meld tilbake om at det skal vere strødd til Hodlekve, og at strøbilen er på veg attende mot Sogndal. Både bilberging og politiet var på staden.
– Det stod ein semitrailer på tvers, som sperrar begge køyrefelt. No har bilberinga fått flytta den litt, men den sperrar framleis eine køyrefeltet. Det er lange køar på begge sider, opplyser operasjonsleiar Johnny Lilleng hos politiet.
– Vi har fått tilbakemelding frå våre folk at det er kaos, og vi vil drive trafikkdirigering. Fleire, både små og store bilar, har fått problem, legg han til.
Klokka 18.30 var vegen rydda, men politiet opplyser at det framleis er glatt i området.
Store problem
Vinterføret har skapt store problem på vegane i fylket måndag. Magnhildskaret var lenge stengt i Bremanger på grunn av vogntog som stod fast.
- LES OGSÅ: Skadd etter trafikkulukke
- LES OGSÅ: Køen var allereie lang - så sklei lastebilen...
Store delar av føremiddagen skapte både trafikkulukke og trafikkuhell lange køar ved Moskog.
I tillegg var fylkesveg 609 stengd ved Stongfjorden stengd i fleire timar etter at eit vogntog mista to hjul. Vegen var opna att like over klokka 18.
Slik er stoda
Uvêr har stengd fleire vegar. Slik er situasjonen klokka 19 måndag:
- Rv 13 Vikafjellet - Mellombels stengd på grunn av uvêr. Blir ikkje opna i dag.
- Rv 52 Hemsedalsfjellet - Kolonnekøyring på grunn av uvêr. Ventetid kring to timar.
- Fv 13 Gaularfjell - Mellombels stengd på grunn av uvêr.
- Fv 50 Hol - Aurland - Mellombels stengd mellom Nilsegard og Øyestøl på grunn av uvêr.
- Fv 53 Tyin - Årdal - Mellombels stengd på grunn av uvêr.
- Fv 616 Isane - Davik - Mellombels stengd på grunn av steinras. Venta opna onsdag 7. desember.