Mot slutten av 2016 venta pasientane i Helse Førde i snitt i 41 dagar. Det er ein nedgang på 22 dagar frå året før skriv helseføretaket i ei pressemelding. Kravet frå helsestyresmaktene var at ventetida i spesialisthelsetenesta skulle vere under 65 dagar.
- Helse Førde har kortast ventetid av helseføretaka i Helse Vest.
- Helse Vest har kortast ventetid av dei fire helseregionane.
- Kortast ventetid i psykisk helsevern: 29 dagar i slutten av 2016, redusert med fem dagar samanlikna med året før.
Ifølgje helseføretaket kjem betringa som følgje av god planlegging.
– Avdelingane ser nytta av å gjere unna planlegginga med ein gong, skriv informasjonssjef, Terje Ulvedal.
Tala blir presenterte for styret i møte 27. januar i samband med den årlege meldinga frå føretaket. I framlegg til vedtak heiter det at meldinga synleggjer at Helse Førde har synt god utvikling og auka kvaliteten innanfor fleire sentrale område.