Politiet rykte ut etter melding om at den eine hadde ein gjenstand som likna ein pistol. Meldinga kom tidlegare i ettermiddag.
Mennene vart pågripne på gata utanfor Best Western-hotellet. Pågripinga klokka 1940 føregjek utan dramatikk.
– Dei to er rusa og blir sittande i arresten til i morgon. Begge er kjende for oss frå før. Dei er heimehøyrande i Nordfjord, seier operasjonsleiar Inge Værøy hos Sogn og Fjordane politidistrikt.
Polititenestemennene væpna seg før dei aksjonerte.
– Det var på bakgrunn av meldinga om at den eine hadde hatt ein våpenliknande gjenstand. På det tidspunktet var det uklart om gjenstanden var ekte eller ikkje, seier Værøy.
– Har de funne noko våpen?
– Det er funne ei etterlikning av ein pistol.
Det er førebels uvisst om nokon har blitt trua av mennene.
– Omstenda kring situasjonen, og om det har vore noko konkret trussel, har vi ikkje kome til, seier Værøy.