– Eg hadde i alle fall håpa at mamma skulle få sitt eige rom til jul, men det ser jo ikkje slik ut, seier Bjørg Jagedal.
Mor hennar er 93 år gamal, og har fått fast plass på sjukeheimen på Furuhaugane i Florø. I meir enn eit halvt år har ho delt rom med to andre personar som ho ikkje kjenner.
– Det er veldig vanskeleg for ho. Ho sit klemt opp i ei gardin, og har ikkje noko privatliv. Før sat ho alltid og høyrde på radio, no torer ho ikkje, for ho vil ikkje forstyrre dei andre på rommet.
93-åringen tykkjer ikkje det er noko kjekt å bu på rom med to andre, og dei pårørande likar det heller ikkje. Slik skal det heller ikkje vere, men Jagedal meiner at mora hennar ikkje er den einaste som må finne seg i slikt.
Folk på sjukeheim har ikkje noko lovleg krav om å få bu på einerom, men både Stortinget og fleire regjeringar har signalisert at det skal vere ein rett fastbuande skal ha.
Ordføraren: – Slik skal det ikkje vere
Ordførar i Flora Ola Teigen (Ap) fortel at det ikkje skal vere slik at fastbuande på sjukeheimen skal måtte dele rom med andre.
– Vi har alltid praktisert det slik at folk som bur fast på sjukeheimen i Florø, dei skal ha einerom. Slik praktiserer vi det framleis, seier Teigen.
Når han får høyre at det ikkje er alltid det stemmer, seier han at det ikkje er slik det skal vere.
– Det er ikkje slik det skal vere. Det hender at folk som bur på sjukeheimen mellombels må dele rom med andre, men dei fastbuande skal ikkje det.
Også tidlegare har Flora kommune fått kritikk for tronge buforhold på Furuhaugane bu- og servicesenter. I 2010 fekk kommunen refs frå Fylkeslegen då ein dement bebuarar måtte bu på eit baderom.
– Eg blir lei meg av dette
Pensjonistforbundet seier at det er ganske lenge sidan sist dei høyrde om eit så graverande tilfelle som situasjonen i Florø.
– Det skal ikkje vere slik i 2017, og eg blir veldig lei meg når eg høyrer om fastbuande som må bu på rom med to andre, og som må feire jula slik. Det er moralsk forkasteleg å behandle eldre folk slik, seier generalsekretær Harald Olimb Norman.
Ordførar Ola Teigen lovar at ting skal bli betre om eit års tid, då vil nye eldrebustader stå klare. Før den tid skulle Bjørg Jagedal gjerne sett at mor hennar fekk meir plass.