22-åringen med den kraftfulle og presise venstrefoten fekk sitt store gjennombrot i 2011 med seks scoringar for Sogndal. Same året stod han også fram som speleavhengig.
- Les også: – Det er ein knallhard jobb
Året etter fekk Ørjan Hopen talentprisen for april. Sidan har det gått trått for sogndølen. No er han og Sogndal samde om å gå kvar sin veg.
– No har eg vore her i sju-åtte år og trakka i dei same spora. Dessutan har ein alltid godt av litt miljøskifte, nye utfordringar og nye impulsar, seier Hopen til NRK.
– Slik er fotballivet
Kontrakten med Sogndal gjekk ut etter 2014-sesongen. Den andre sesongen på rad han spelte på utlån i ein 1. divisjonsklubb. Totalt vart det 68 kampar og ni mål i Sogndal-trøya sidan A-lagsdebuten mot Ranheim i 2010.
- Les også:
I tillegg vart det totalt 21 kampar og tre scoringar for Nest-Sotra og Bryne. Den endelege avgjerda tok han i desember, saman med hovudtrenar Eirik Bakke.
– Slik er fotballivet. Eg har hatt mange gode stunder her, så eg ser ikkje på dette som noko nederlag. Ein veit heller aldri kva som skjer i fotball. Eg er 22 år og det er forhåpentlegvis framleis tidleg i fotballkarrieren. Tida vil vise om eg kjem attende, seier han.
I Sogndal ut januar
Bakke stadfestar også overfor NRK at Hopen, som har vore sentral på fleire aldersfastlagde landslag, ikkje er med i planane han er i ferd med å leggje for klubben han har teke over.
– Vi har hatt ein god dialog med Ørjan, og tykkjer det er greitt at han ynskjer å prøve noko nytt og tek steget vidare, seier han.
Hopen har moglegheit til å trene med Sogndal ut januar.
- Les også:
– Eg har ein agent som pratar med klubbar, så eg konsentrerer meg først og fremst om å trene og å halde meg i form slik at eg er klar når ting skjer, seier Hopen.
– Har du alternativ?
– Det er fleire klubbar på bana, så vi får sjå kva det blir til. Eg kjem ikkje til å stå kontraktlaus når vi kjem til 31. mars.
Har stagnert
Etter at Statoil gav han talentprisen for snart tre år sidan, har Hopen fått så som så med tillit i Sogndal. Det førte han til Jæren og utlån i Bryne for to år sidan. I fjor var det i Nest-Sotra han fekk speletid.
Han vedgår at utviklinga har stagnert siste åra.
– Men eg har berre meg sjølv å takke. Eg har nok ikkje lagt ned ein god nok jobb for å vere i startellevaren og for å kunne prester bra. Men om det har stogga litt opp, så må eg berre ta rennefart på nytt att, seier han.
Vurderer studiar
22-åringen seier han no ynskjer å prøve seg på studiar. Etter fullført vidaregåande skule har han konsentrert seg om fotball. Kva er førebels uvisst.
Når tida for no er over som Sogndal-spelar, står oppgjera mot Brann att som gode minne for 22-åringen. I 2011 senka han erkerivalen med kampens einaste mål. Året etter sikra han saman med Ulrik Flo Sogndal fornya eliteseriekontrakt mot Brann.
– Både den i 2011 og 2012 var artige kampar. Det er alltid kjekt å få besøk av storebror, og å slå dei kvar gong, gliser Hopen.