Ordføraren tok jomfruturen

Det var lite som minna om striden, då lustringane i hopetal farta til opninga av det nye badeanlegget i Gaupne.

Ordførar Ivar Kvalen (Sp) fekk ikkje berre æra av å klyppe snora. Han var også først ute i sklia.

– Det var kjempemoro. Dette blir ein av mange hundre turar, stråla han.

100 millionar

Badeanlegget vart omstridd etter kvart som kostnaden vaks og vaks sidan ideen såg dagens lys i 2003.

I dag var alle stridsøkser gravlagt då ordføraren, ikledd badekåpe, klypte snora ute. Og kasta seg i sklia inne.

(Artikkelen held fram under videoen)

– Under prosessen, og då det nærma seg slutten av prosessen, så var det temperatur i lustrapolitikken, stadfestar Kvalen. Også innbyggjarane i kommunen var delt, der spesielt innbyggjarane i bygdene rundt kommunesenteret Gaupne var skeptiske.

Skepsis vart motstand

Ein av desse var Ernst Veum (Frp). I utgangspunktet var han positiv. Då han såg rekninga og kva følgje det kunne få for andre viktige oppgåver i kommunen, vaks skepsisen til motstand.

• LES OGSÅ: Omstridd badeanlegg står no klart

(Artikkelen held fram under biletet)

– Men striden har dempa seg no, konstaterer han og seier seg samd med Sp-ordføraren at opninga er noko alle i kommunen har gledd seg til. Kanskje ikkje så rart det med eit basseng på 25 meter og seks baner, stupetårn, klatrevegg, sklier og barnebasseng.

– Eg har høyrt at ungane i barnehagen byggjer badeland i sandkassene, smilte Kvalen.

Lange dagar

Og feststemning vart det til gagns då anlegget opna i dag. Frå anlegget har ein utsikt mot fjord, fjell og fossefall. Ein kan med andre ord nyte både det som er inne og ute.

(Artikkelen held fram under biletet)

Dagleg leiar Nina Gudvang fortel om lange og hektiske dagar for å få alt klart til opninga. Natt til fredag vakna ho kvar time, så det var ein letta Gudvang som kunne konstatere at anlegget var opna.

– Eg har ikkje ord. No er eg kjempeglad, stråla ho.