Denne veka blei eit følge på minst ni sportsbilar observert med svært høg fart på E39 i Sogn og Fjordane. Ein av dei politiet stoppa hadde ei fart på 137 km/t i 80-sona, og fekk ei bot på 15 000 kroner.
– Bøtene såg ikkje ut til å gjere spesielt stort inntrykk på dei. Det er nok eit lite innhogg i økonomien deira, seier Torbjørn Sælen i utrykkingspolitiet.
Dei hadde lova politiet å slakke på gassen, men Sælen er ikkje sikker på at det kjem til å skje.
– Utlendingar er overrepresenterte
Sælen seier at det er mange utanlandske sjåførar blant dei som blir teke med høg fart i fylket i sommarsesongen. Han meiner mange av utlendingane ikkje har dei same haldningane til hastigheit på vegane som nordmenn har.
– Den respekten vi har for køyrereglane i Noreg er ikkje like stor hos dei som kjem hit, seier han.
UP-sjef for Vestlandet, Terje Oksnes, er forundra over hastigheita sportsbil-sjåførane hadde, sidan vi har høge fartsbøter i Noreg.
– Det er velkjent at vi har mange kontrollar og høge bøter. Dei utanlandske har den same risikoen som alle andre førarar, seier Oksnes.
Køyrenekt i Noreg
Ein av dei utanlandske sportsbil-sjåførane som blei teke fekk køyrenekt. Det vil seie at dei ikkje får lov til å køyre bil i Noreg i ei viss periode, men kan køyre bil i alle andre land. Terje Oksnes seier det er vanskeleg å føre kontroll over bilistar som har fått køyreforbod.
– Dei kan reise heim til heimlandet og få nytt førarkort og vise fram eit gyldig førarkort i Noreg etterpå. Det er utfordrande å fange opp desse, seier han.
Han seier at dei også har teke utanlandske sjåførar i å køyre sjølv om dei har fått nekt.