Opnar for bompenge-løysing

Det meiner Fjaler-ordførar Arve Helle (Ap).

Han fryktar at det vil gå 15-20 år før den smale vegen innetter Dalsfjorden blir utbetra.

– Dersom vilkåra for bompengar er til stades, er eg klar for å gå for det, seier Helle til Firda.

Sa nei i Nordfjord

Ordføraren tek dermed til orde for ei liknande løysing som det politikarane i Stryn tidlegare i år sa nei til. Der stemte kommunestyret imot bompengeløysing for å få framskunda utebringa av fylkesveg 60 mellom Olden og Innvik.

• LES OGSÅ: Nei til bompengar på fv. 60

Bompengar har også vore tema for å få realisert kystvegen Florø - Måløy, og ein eventuell Førde-pakke på E39.

Men vegen frå Dale til Osen i Gaular er så dårleg at ein ikkje kan vente på offentleg finansiering meiner Helle.

(Artikkelen held fram under katet.)

• LES OGSÅ: Vil byggje kystveg med bompengar

Trur ikkje bompengar skremmer

Ordføraren viser til at Dalsfjordbrua som opna i 2012 truleg vil føre med seg trafikkauke langs strekningen som mange alt i dag brukar til jobbpendling. Med brua på plass, ventar Helle at også askvollingar køyrer om Dalsfjorden.

– Bompengar vil kanskje få enkelte til å velje andre ruter, men neppe mange, seier han til Firda.

– Må vere villige til å betale litt

Utan bompengar må oppgraderinga av vegen vente på tur. Fylkespolitikarane har prioritert Dalsfjordbrua, Bremanger II, Olden-Innvik og Hornindal-Møre på plassane framfor fylkesveg 57.

Då kan 50 kroner i bompengar vere ei løysing, trur Helle.

– Skal vi få fortgang i dette, må vi vere villige til å betale litt sjølve, seier han til avisa.

Helle understrekar at bompengeforslaget førebels berre er eit personleg ytring, men at han vil jobbe for å få forslaget inn i Fjaler Ap sitt program.

• LES OGSÅ. Fjærlandsbommen er historie

(Artikkelen held fram under avrøystinga.)

Berre to bomvegar att

Etter at Naustdalstunnelen og Fjærlandsvegen i løpet av 2010 etter tur er nedbetalte og bomstasjonane avvikla, er det berre to bomvegar att i Sogn og Fjordane - begge i Sogn.

På ferjesambandet Lavik - Oppedal blir det kravd inn pengar for Bogstunnelen på E39, mens Fatlatunnelen på rv. 5 mellom Sogndal og Leikanger har autopass-ordning.

Bompengefinansieringa av Manheller - Fodnes, kravd inn på ferjebilleten, var nedbetalt for eit par år sidan.