Måndag avgjorde regjeringa den nye organiseringa av Statens vegvesen. Vegvesenet skal delast i seks divisjonar, som skal styrast frå Tromsø, Trondheim, Bergen, Arendal, Moss og Drammen.
Ole Simen Nesdal, som er tillitsvald for Tekna i Vegvesenet, seier omorganiseringane fører til usikkerheit blant dei tilsette på Leikanger, der dei no har regionvegskontor.
– Det er ei usikker stemning her på Leikanger. Alle skal finne seg ein ny plass, anten i Statens vegvesen eller i fylkeskommunen, og mange forlèt skuta og startar i andre bedrifter, seier Nesdal, og legg til:
– Omorganiseringar fører til usikkerheit, og folk flest likar ikkje usikkerheit. Slik er det berre.
Fryktar utflytting
Leikanger-ordførar Jon Håkon Odd seier det er urovekkande, men ikkje overraskande, at fleire av dei tilsette i Vegvesenet no ser etter nye jobbar.
– Dette er veldig flinke folk som gjer viktige jobbar, og det er klart at dei er attraktive på arbeidsmarknaden. Det som skremmer meg er viss dei må flytte for å ha desse jobbane, og dette fører til ei utflytting frå Sogn, seier han.
Avdelingsdirektør Svenn Egil Finden i Statens vegvesen Sogn og Fjordane er ikkje bekymra omorganiseringa vil gå utover arbeidsplassar.
– Strukturen vert endra, men mykje av grunnprinsippa vert dei same, seier han.
Ønskjer arbeidsplassar i heile landet
Etter vedtaket vart offentleggjort måndag peikte samferdsleminister Jon Georg Dale på at omorganiseringa skal tilpasse Vegvesenet til dei utfordringane dei har framover.
Dale lova også at dei stadane som no har regionvegskontor, som Leikanger, framleis skal vere viktige.
– Vi har eit viktig kompetansemiljø på Leikanger, som vi skal byggje vidare på. Flinke folk som har attraktive jobbar også i framtida med denne avgjerda. Dette har vore viktig for oss fordi vi er opptekne av at det skal vere arbeidsplassar, også statlege, i heile landet.
– Ei sentraliserande kraft
Nesdal seier at dei tilsette på Leikanger likevel er bekymra for framtida til fagmiljøet på Leikanger.
– Alle dei omorganiseringane som har vore på Leikanger til no har hatt ei sentraliserande kraft i seg, seier han.
– Så bekymringa er der, men vi har vorte lova at Leikanger skal satsast på, spesielt på veg-sida, og her har vi eit veldig godt fagmiljø.
Som ein del av omorganiseringa skal ansvaret for fylkesvegane flyttast til fylkeskommunane. Leikanger-ordføraren seier at det må byggjast eit nytt fagmiljø i samband med dette.
– Det er klart at Leikanger vil vere vertskap for viktige arbeidsplassar når det gjeld administrasjon av fylkesvegar. Det eg er redd for er at vi ikkje klarer å samlokalisere det med den statlege delen, og oppnå dei synergiane som vi kome av å ha eitt sterkt felles vegmiljø i Vestland her i Sogn.