- Sjå første episode i slutten av saka, eller på NRK1 kl.20.45 på sundag.
Sidan seinhausten 2002 har det folkekjære programmet gått på NRK, og på sundag er det premiere på ein splitter ny sesong av dokumentarserien. I sesong 17 meiner serieskaparane Arve Uglum og Torje Bjellaas at det spesielt er ein ting som går att.
– Kjærleik! Alt frå kjærleik til båtar, menneske, eller stadar.
Og allereie frå første episode får vi servert ei ekte kjærleikshistorie. På Tussøya i Troms lever snikkaren og ingeniøren som møtte kvarandre seint i livet. Livet på den aude øya byr på alt frå gjenstridige sauer, djup kjærleik og vakkert lys.
Nettopp lyset er ei utfordring når nesten halve sesongen er spelt inn i Nord-Noreg denne vinteren. Mørketid gjorde at Uglum og Bjellaas måtte ta sjansar. I kolsvarte november pakka dei sekken og sette seg på flyet nordover.
– Det er så lite dagslys at du berre har nokre få timar på å filme, men vi tok sjansen. Når vi først var der hadde vi ein enorm flaks, seier Uglum.
For lyset spelte verkeleg på lag med «Der ingen skulle tru at nokon kunne bu», og når lyset først er så vakkert som det kan bli, såg ikkje fotografen nokon spesiell grunn til å sove.
– Eg er alltid på jakt etter lyset og då må ein jobbe effektivt. Det var som ein døgnopen godteributikk, seier Bjellaas.