I år går dei aller første elkraftingeniørane ut av Høgskulen i Sogn og Fjordane med ei bacheleorutdanning i handa.
Utdanninga var ei storsatsing mellom fleire, næringslivet i Sogn og Fjordane, Sparebanken Sogn og Fjordane. Årsaka var at fylket vil trenge minst 120 elkraftingeniørar dei neste ti åra.
- Les også:
- Les også:
Men av dei som går ut av utdanninga no er det ikkje alle som har jobb. Karl Martin Opseth Norbom har fått seg jobb på Caverion i Førde frå august, men han seier at det no er hard konkurranse om jobbane.
– Det er mange søkjarar på dei jobbane som er, og vi er heilt nye og hamnar vel litt bak i rekkja.
– Hadde du trudd det då du tok til på utdanninga?
– Det vil alltid svinge i marknaden, ein har aldri nokon garanti for å få jobb uansett.
Mange konkurrentar
Marius Folkestad tek det og med fatning at det ikkje kryr av ledige jobbar.
– Dette må vi berre finne oss i. Oljebransjen er nedbemanna, og det gjer at det er ein del konkurrentar som vi må stille mot når vi søkjer jobb. Vi må berre vere flinkare til å selje oss sjølve og vere målretta mot dei jobbane vi verkeleg vil ha.
Han har fått eit jobbtilbod, men det har han førebels ikkje lov til å seie noko om.
– Ikkje heilsvart
Asgeir Aase er nettdirektør i SFE, som var mellom aktørane som ivra for å få til ei elkraftutdanning ved Høgskulen i Sogn og Fjordane. Han ser lyst på framtida til dei som no er nyutdanna.
– Vi er eit fylke som skal byggje mykje, men det svingar, og det er endra tider. Då vi gjekk hardt inn for studiet i 2011 peikte pilene oppover. Så skjer det ting i oljesektoren, og kraftprisen vart halvert. Det endra biletet, men vi er mange rundt 60 år som skal skiftast ut. Og vi i SFE skal tilsette to-tre stykke i sommar. Så det er ikkje heilsvart.
– Stolte over studentane
Torsdag hadde ingeniørstudentane i automasjon og elkraft på Høgskulen ein presentasjon av avslutningsoppgåvene sine. Instituttleiar Eli Nummedal er imponert over det dei har fått til.
– Vi er stolte både tilsette og studentar, ikkje minst måten dei har formidla det på. Og desse studentane er fantastisk viktige for regionen og utviklinga av regionen. Dei som studerer her blir ofte verande, og vi trekkjer til oss nye folk. Det er veldig gledeleg å ha både automasjon og elkraft her.
Til hausten kjem det nye studentar, som mellom anna får nyte godt av elkraftlaboratoriet på høgskulen.
– Vi har landets finaste laboratorium knytt til elkraft, og det er viktig når vi skal tiltrekkje oss nye studentar.