– Alt ser jo rett ut, men fakturaen kjem ikkje frå oss, seier Asbjørn Steen, som er styreleiar i Rødekorsbygget i Førde.
Med det blotte auget ser det ut som ein heilt vanleg faktura med Rødekorsbygget som avsendar. Kvitt ark, logo med raudt kors og opplysningar om kva som skjer om betalinga blir for sein.
Fakturaen har dumpa ned i postkassene til både næringslivet og mannen i gata med oppmodingar om å betale pengar til born som treng det.
Men fakturaen er ikkje ekte.
– Vi samlar ikkje inn pengar. Vi hadde aldri sendt ut noko sånt, seier Steen. Rødekorsbygget er eigd av Røde Kors, Førde kommune og Førde helselag.
Ser du nærare på fakturaen, så kan du sjå både små og store skrivefeil.
– Utlandssjefen i Røde Kors er sett opp som referanse, men dei har ikkje klart å skrive namnet hans rett, seier Steen, som har vore sentral i Sogn og Fjordane Røde Kors i fleire år.
Dukka opp i postkassa til Cubus
Svindelfakturaen har mellom anna nådd kleskjeda Cubus. Regionsjef Inger Lise Fossen stussa over logoen som var brukt.
– Eg hadde ikkje bestilt noko. Då eg såg nærare på logoen til Røde Kors i fakturaen, såg eg at han ikkje stemde, seier ho.
No har Fossen gitt beskjed til både økonomi- og svindelavdelinga til Cubus. Ho meiner svindlarane er utspekulerte.
– Vi er inne i ei tid der mange er ekstra gavmilde. Det er noko svindlarar brukar til sin fordel og mange kan difor bli utnytta, seier Fossen.
Regionsjefen ber alle om sjå nøye gjennom rekningane som dukkar opp i postkassa.
– Dette er forferdeleg trist. Røde Kors gjer ein god jobb. Eg oppfordrar alle til å sjekke fakturaane dei får, seier Fossen.
Gjekk rett til politiet
Asbjørn Steen meiner fleire kan ha gått i fella med å betale den falske fakturaen som er i omløp.
– Adressa, organisasjonsnummeret og telefonnummeret på fakturaen er våre, men vi har ikkje laga eller sendt ut ein slik faktura, seier han.
No er saka meld til politiet.
– Dette er utnytting av folk som lir. Svindlarane har gått for langt. Eg har ikkje ord, seier Steen.
Røde Kors seier dei tek saka særs alvorleg og skal politimelde saka.
– Vi blei gjort kjende med dette i dag, og tar alle svindelforsøk som særs alvorleg. Heldigvis er det ikkje ofte vi opplever svindelforsøk, seier kommunikasjonsdirektør Øistein Mjærum.