– Det er to trinn under proffsirkuset og World tour. Likevel er Team Ringeriks-kraft godt på veg dit, seier Sedrik Engebø Ullebø.
I helga signerte stortalentet frå Høyanger for Team Ringeriks-kraft. 18-åringen vart tidlegare i august kåra til årets sykkeltalent. No skal han sykle for Team Ringeriks-kraft. Det er eit kontinentallag, som ligg to nivå under dei store internasjonale laga. Ullebø er optimistisk innstilt til å ta eit steg opp.
– Det er eit godt stykke att til eg kan sykle dei store ritta, men som kontinentalryttar får eg tilgang til å sykle proffritt med dei store gutane.
- Les også:
Vil bli best
Ullebø har lenge blitt sett på som eit stort talent både innan sykkel og langrenn. Dei siste åra har han gått på Noregs toppidrettsgymnas. 18-åringen legg ikkje skjul på kva som er målet.
– Målet er først å fremst å bli proff. Og når eg har blitt det er målet å bli best. No aller først håpar eg på å få sykle Tour des Fjords på heimebane i Sogn og Fjordane.
- Les også:
Stort steg
Sykkelekspert i NRK og tidlegare proffsyklist Dag Erik Pedersen har sjølv merittar på topp internasjonalt nivå. Han meiner avtalen med Team Ringeriks-kraft vil gi Ullebø moglegheita til å nå toppen.
– Det å signere for eit sykkellag som Team Ringeriks-kraft er eit stort steg å ta. Eit steg ikkje mange får moglegheita til. Så mitt råd må vere å tenkje langsiktig, det å nå toppen innan sykling krev målretta jobbing kvar dag i mange år, seier Pedersen.