NRK Meny
Normal

Nytt håp for Englandsbåten

Det er på nytt håp om å få tilbake Englandsbåten mellom Bergen og Newcastle.

Queen of Scandinavia

SAKNA: MS Queen of Scandinavia gjekk i rute som 'Englandsbåten' og er sårt sakna av den norske turistnæringa.

Foto: SCAN-FOTO / Scanpix

Den britiske regjeringa vil i løpet av hausten avgjere om reiarlaget Norwegian Seaways skal få statleg støtte til å drifte båtruta, melder Bergens Tidende i dag.

Det nyetablerte selskapet Norwegian Seaways har søkt om støtte til å få båtruta på plass igjen, og ifølgje avisa er det no fleire kommunar i det nordaustlege England som stiller seg bak søknaden.

Viktig for turistnæringa på Vestlandet

Fram til båtruta vart nedlagt i 2008 var Englandsbåten svært viktig for turistnæringa på Vestlandet. Kvikne's Hotell i Balestrand er blant dei som har fått merke at den britiske marknaden har dalt.

– England var den viktigaste utanlandsmarknaden vår og vi merka med det same kraftig tilbakegang av britiske gjestar då sambandet vart lagt ned, fortalde hotelldirektør Sigurd Kvikne til NRK.no i fjor vinter.

Fleire reiselivsaktørar varsla då at dei ikkje vil gje opp kampen, og no ser det ut til at det kan skje ting.

Trur ruta vil skaffe turistar og arbeidsplassar

Reiselivsdirektør Ole Warberg i Bergen Reiselivslag stadfestar overfor Bergens Tidende at dei framleis jobbar med å få til ei ny rute til England. Kor nære dei er å kome i mål kan han ikkje seie i dag.

Også på den andre sida av Nordsjøen er det mykje på spel. Ordføraren i Tyneside Council skal ifølgje Bergens Tidende ha sagt ei ny ferjerute vil vere ei viktig økonomisk drivkraft for kommunen.

– Det er ingen tvil hos oss om at ferjesambandet til Norge vil skaffe turistar og arbeidsplassar, ikkje berre i Tyneside, men over heile Nordaust-England, seier Linda Arkley.

Bergens Tidende skriv at den britiske regjeringa kvart år deler ut store beløp til utvikling av næringslivsprosjekt som kan skaffe arbeid i regionar med mykje arbeidsløyse.

Aksjonistar i rettsal, aksjonistar lenkar seg fast på Engebøfjellet
Teaterfestivalen i Fjaler  
Frida Melvær møtte innbygarane dagen derpå