Hopp til innhold

Nyt vakker musikk på julegalla i Grieghallen

I kveld kan du både sjå og høyre NRK sin julegalla frå Grieghallen i Bergen. Kjende og kjære artistar står på scena, når artistar frå Vestlandet lagar julestemning for heile landet.

Morten Abel, Razika, Fargespill, Hilde Selvikvåg og ei rekkje andre kjende artistar frå Vestlandet lagar julestemning for heile familien i Grieghallen. Artistane byr både på klassiske og nye julesongar, men også eigne stemningsfulle låtar. Programleiarar er Finn Tokvam og Sigrid Moldestad.

SJÅ HEILE KONSERTEN: Nyt ein time med vakker musikk frå Vestlandet.

NRK i Sogn og Fjordane, Hordaland og Rogaland står bak konserten som blei arrangert i midten av desember. Truleg er det aller første gong at så mange artistar frå Vestlandet står saman på same scene i ein slik TV-produksjon.

I TV-programmet får du sjå Morten Abel, Hilde Selvikvåg, Razika, Fargespill, Sigrid Moldestad, Hanne Sørvaag, Britt-Synnøve Johansen, Randi Tytingvåg, Christine Sandtorv, Jan Toft, Olav Stedje, Claudia Scott og Egil Eldøen. Programleiarar er Finn Tokvam og Sigrid Moldestad.

– Det var ei fantastisk flott stemning i Grieghallen denne kvelden med vestlandsk mat i foajeen, musikarar frå Vestlandet som lagde fest og eit fantastisk publikum som sette ein ekstra spiss for det heile. Eg trur vi også klarar å formidle alt dette i konserten som vi sender i jula på NRK, seier prosjektleiar Stian Sjursen Takle.

No er konserten redigert til ein versjon på ein time. Du kan sjå den på TV på NRK1 i beste sendetid 1. juledag klokka 20.55.

– Vi byr på både tradisjonelle julesongar, nye julesongar og nokre av artistane sine eigne låtar. Målet vårt er å skape ein konsert som både engasjerer, rører, skapar stemning og er godt selskap for både radiolyttarar og TV-sjåarar, seier Sjursen Takle.

Sigrid Moldestad framføre songen "Vintersong" under Julegalla i Grieghallen 2016

JULEMUSIKK: Her får du ein smakebit – Sigrid Moldestad med «Vintersong».