Fylkesdirektør for tannhelse, Clara Øberg orienterte i dag fylkesutvalet om vegen vidare for den nye tannklinikk-strukturen.
No har dei vurdert høyringsuttalane etter at dei gjorde framlegg om å fjerne 13 av 28 tannklinikkar i fylket. Det kan bety framleis tannklinikk i Askvoll.
– Det går på reiseavstand, mellom anna til Bulandet, Værlandet og Atløy, og busstilbodet som er i samband med det, seier Øberg.
Kutt i Dale?
Det har ikkje lukkast NRK å få kommentar frå Askvoll-ordførar Frida Melvær (H), men det som fører til glede i Askvoll, kan vere kroken på døra for tannklinikken i Fjaler.
– Det er fleire moglegheiter. Det eine kan vere å behalde både Askvoll og Dale, det andre at ein lagar ein større klinikk i Askvoll. Det har vi ikkje konkludert med, seier Øberg.
UVISSE: Ordførar Gunhild Berge Stang (V) er spent på korleis tannlegesituasjonen i Fjaler, Hyllestad og Askvoll er tenkt løyst.
Foto: Oddleif Løset / NRKFjaler-ordførarGunhild Berge Stang (V) trur endringa gir ytterlegare hovudbry når fylket avgjer tannlegetilbodet i Fjaler, Hyllestad og Askvoll.
Må gjere avvegingar
Hyllestad var på kuttlista, men vart fjerna. I framtida har ein visjon om ein felles klinikk for Fjaler og Hyllestad.
- Les også: Skulda for lukka prosess og hemmeleghald
Stang seier klinikken i Dale har vore viktig for både vidaregåande elevar og elevar ved United World College. Ho ynskjer å behalde tilbodet.
– Men det er viktig å finne den beste heilskapelege løysinga. Geografien er krevjande i Fjaler, Hyllestad og Askvoll, så her må ein gjere avvegingar i høve til brukarar, elevar, eldre og geografisk plassering, seier ho.
– Uhaldbare kutt
– Avstandsutfordringane kjem ein ikkje utanom, uansett korleis ein vrir og vender på det, legg Stang til.
Ordførar Morten Askvik (Sp) i Hyllestad har ikkje endra syn på at ein heller bør styrke tannklinikktilbodet i kommunane, uavhengig av kommunestruktur. Han vil ha tannklinikk i både Hyllestad og Fjaler.
– Det er så store behov, og så tydeleg store ulemper for brukarane at det ikkje er haldbart å leggje ned i Hyllestad eller Fjaler, seier han.
Halv million kroner
Lange reiseavstandar gjer at også Bremanger er inne att på det framtidige tannklinikk-kartet. Dette gjer at fylkesadministrasjonen må gjere ytterlegare endringar for å nå målet om 11 millionar i innsparingar.
– Det gir oss større utfordringar. No jobbar vi vidare med saka fram mot fylkesutvalet i mai, og så endeleg vedtak i juni, seier Øberg.
Lærdal sitt ynskje om å samlokalisere tannklinikk og lokalmedisinsk senter blir ikkje vurdert i denne omgang.
– Dei har gode argument som peikar på at tannklinikken er primærhelsetensete som bør leggast inn i deira lokalmedisinske senter. Men det er meir ei semje som må bli mellom kommunane, seier Øberg.
