Kulturdepartementet skriv i eit brev til museet at det ikkje er aktuelt med statleg løyving før etter 2007.
Ordførar i Balestrand, Erland Fagermoen, tolkar dette som at staten vil løyve pengar. Han set no si lit til at fylkespolitikarane garanterer for denne summen.
- Det er på tide vi startar bygginga. Sjølv om brevet ikkje er tilsagn om pengar, så verkar det som om det kjem pengar i 2007, meiner Fagermoen.
Det nasjonale reiselivsmuseet i Balestrand er kome i ein vanskeleg situasjon fordi fylkeskommunen prioriterte det bak opera på Nordfjordeid og kunstmuseum i Førde. Museet i Balestrand skal lokaliserast saman med Kviknes hotell og byggjeplanane er komne så langt at det blir for lenge å vente på 25 millionar kroner i statleg støtte etter 2007.
- Har pengar
Men Fagermoen meiner brevet er eit signal om at staten vil delta, og no håpar han fylkestinget i vår vil stille garanti for denne summen inntil pengane kjem frå staten.
- Berre vi får garantien, så kan vi starte bygginga. Vi har pengar frå både kommunen og fylkeskommunen til å starte bygginga med.