– Dette har vore regelen for skulane lenge, og no meiner me det bør vera like reglar for både tilsette, skuleelevar og folkevalde. Sjølv om dei folkevalde utfører eit verv og i realiteten er på tenestereise, så er det viktig at heller ikkje dei røyker på fylkeskommunal grunn, seier Jenny Følling, fylkesvaraordførar frå Senterpartiet.
Får ikkje stå på hjørnet lenger
Om dei folkevalde no vil ha seg ein røyk, må dei gå ein anna stad.
– Det er ikkje noko fint syn at det står nokon utanfor inngangen til fylkeskommunen og røyker, seier fylkesvaraordføraren.
Ho er glad for vedtaket, og meiner at røykarane vert ivaretekne sidan dei får lov å røyke på tilviste stader eller utanfor området til fylkeskommunen.
Olin Johanne Henden (H) seier det er ei avveging mellom personleg fridom og folkehelse.
– I tillegg har det kome nye reglar. Det er problematisk at me som arbeidsgjevarar har ulike reglar for fylkeskommunalt tilsette og andre på dei vidaregåande skulane. Det er ikkje bra at det er ulike reglar, seier Henden.
Politikarane kan framleis snuse
Det er fylkestinget som tek den endeleg avgjerd på tinget i desember. I forslaget som vart vedteke onsdag, kjem det også fram at tilsette og folkevalde skal få tilbod om røykeavvenningskurs.
Å bruke snus blir forbode for tilsette som er i kontakt med born, unge, pasientar eller publikum. Høgre og Venstre var kritiske til det.
– Det er vanskeleg å handheve dette. Som ein lærar har sagt, så sjekkar ikkje dei munnhola på elevane for å sjå om dei snusar. Røyking kan regulerast, men me har ikkje røykepoliti, og me vil heller ikkje ha snuspoliti. Det er heller ikkje like store skadar ved snus, og me vil heller opplyse om farane og slik oppmode folk om å slutte. seier Henden frå Høgre.