NVE legg vekt på dei gode vindforholda i området, og at vindkraftverket truleg vil vere konkurransedyktig i el-sertifikatmarknaden.
Saka må endeleg vedtakast av Olje- og energidepartementet.
Meiner det ikkje er i strid med verneformål
Planane for vindkraftverket inneber å nytte eksisterande djupvasskai ved Borgundvågen nord på Stadlandet for ilandføring av vindturbinkomponentar. Vindkraftverket vil bli knytt til det lokale distribusjonsnettet og bidra til forbetring av kraftnett fram til Skorge transformatorstasjon i Kjødspollen, skriv Vestavind Kraft i ei pressemelding.
Vindkraftverket vil, ifølgje NVE, og vere eit viktig bidrag til å oppfylle politiske målsetjingar om auka satsing på fornybar kraftproduksjon i Norge.
NVE har vurdert at tiltaket ikkje er i strid med verneformåla til vassdraget. Både Fylkesmannen, Sogn og Fjordane fylkeskommune og Direktoratet for naturforvaltning (no Miljødirektoratet) fråfår at det vert gitt løyve.
Fylkesmannen fremja motsegn
Fylkesmannen i Sogn og Fjordane har fremja motsegn til konsesjonssøknaden, men NVE tek ikkje omsyn til motsegna til Fylkesmannen.
Fylkesmannen fremja motsegn mellom anna på grunn av moglege konsekvensar dei ni vindturbinane kan ha for fugl.
NVE meiner at dei viktigaste negative verknadane ved etablering av tiltaket, er knytte til landskap, naturmiljø og reduksjon i INON.
Dei meiner likevel at desse verknadane ikkje er så store at konsesjonssøknaden bør avslåast, og er monaleg mindre enn ved tidlegare vindkraftplanar på Stadlandet.
Planane vart lanserte alt i 2004
NVE har sett ei rekkje vilkår til konsesjonen, mellom anna vilkår for maksimalt støynivå, avstand til værradaren på Kjerringa og utarbeiding av ein miljø- og transportplan som skal vareta særlege omsyn til myrlandskapet og det verna Dalsbøvassdraget.
Fylkesmannen sin posisjon gjer at den endelege avgjerda i saka må takast på departementsnivå. Olje- og energidepartementet vil få saka til endeleg avgjerd når klagefristen er ute.
Planane om eit vindkraftverk på Okla vart lanserte allereie i 2004, og søknad om konsesjon vart send i 2007.