Ein ny rapport som er laga på oppdrag frå Kulturdepartementet har undersøkt konkurransesituasjonen mellom NRK på nett og lokal- og regionalaviser.
Rapporten i sin heilskap gjort tilgjengeleg via Kulturdepartementet sine sider.
– Vår konklusjon er klar: NRK på nett har i lita grad råka andre medieaktørar og publikum har totalt sett fått eit betre tilbod, seier professor Lars Sørgard ved SNF som står bak rapporten til internavisa til NHH.
Bidrar til betre tilbod
NRK har ei svært sterk stilling i medie-marknaden. Enkelte har hevda at andre media vert råka negativt og at publikum får eit dårlegare tilbod totalt.
– Vår innhaldsanalyse viser at NRK og lokalavisene skriv om ulike saker og dermed dekkjer ulike behov.
Rapporten har særskilt tatt føre seg mediesituasjonen i Sogn og Fjordane.
– NRK skriv om heile fylket. Medan lokalavisene skriv om lokale saker i sitt område.
Også når det gjeld nettrafikken viser rapporten at media dekkjer ulike behov.
– NRK og dei regionale og lokale nettavisene viser at dei skriv om ulike saker.
Vel NRK på hendingsnyheiter
Studien har også hatt ei spørjeundersøking som viser at folk vender seg til NRK ved større hendingar.
– Den viser at lesarane i Sogn og Fjordane føretrekkjer NRK på nett når det skjer ei hending.
Han meiner dette underbyggjer at NRK ikkje er nokon konkurrent for lokal- og regionalavisene.
– Vi meiner det at å begrense NRK sin aktivitet på dette området neppe vil vere gunstig for publikum. Det vil heller ikkje i særleg grad føre til auka inntekter for regionale og lokale nettaviser, seier professoren.