Nok ein sumar med traktorulukker: – Dei aller fleste kunne vore ungått

– Dei aller fleste ulukker kunne vore unngått. Då er det veldig trist å sjå den negative trenden som har vore på statistikken dei siste åra, seier Marita Scott i Arbeidstilsynet.

For statistikken er dyster. Ingen anna næring har like mange dødsfall per tilsett som primærnæringane jordbruk, skogbruk og fiske.

• LES OGSÅ: Uroa etter alvorlege traktorveltar
• SJÅ OGSÅ: Traktorulukker uroar bondelagsleiar

Unge og eldre toppar statistikken

– Vi ser jo at veldig mange dødsfall etter arbeidsskade skjer som følgje av velt. Vi har ikkje dei konkrete statistikkane akkurat for traktorvelt, men dei aller fleste dødsulukkene skjer i samband med handtering av store maskinar, seier Scott.

Ho fortel at det er to grupper som er mest utsett: dei mest erfarne og dei heilt ferske.

– Eldre arbeidstakarar er ofte veldig erfarne. Det er store moglegheiter for at når ein gjer ei arbeidsoppgåve veldig mange gonger, så slappar ein meir av i forhold til risikoar, seier ho og held fram.

– Unge arbeidstakarar tek ofte litt større sjansar enn andre, fordi ein trur dette går bra og dette skal eg klare. Så har ein lyst å vise at dette fiksar eg.

• LES OGSÅ: Kritisk for mann (28) etter velt
• LES OGSÅ: Alvorleg for mann (30) etter velt
• LES OGSÅ: 67-åring døydde av skadane

– Går av og til for fort i svingane

Sumaren 2014 har det vore minst tre traktorveltar her i fylket.

I 2012 var det fire alvorlege ulukker i løpet av to sommarmånader. Bondelagsleiar Per Hilleren trur at stress er ein viktig årsak til at ulukkene toppar seg om somrane.

– Vi tenkjer på sikkerheit. Men av og til går ting fort.

Han meiner ein pressa situasjon i finvêret er ein viktig grunn til ulukkene.

–Du har lyst å hausta mest mogleg fôr i godt vêr og skal skunda deg. Då kan det av og til gå litt for fort i svingane, seier Hilleren.

• LES OGSÅ: Såg på nettavis at bestefaren var død