– Det er synd. Bana ligg fantastisk til, og vi har ein veldig lang sesong der. Det seier ivrig golfar og ordførar i Lærdal, Jan Geir Solheim.
Golfbana i Lærdal ligg på Ljøsne, like i nærleiken av ærverdige Rikheim gard. Området er heilt flatt og med veldig lite nedbør. Når golfbana no forsvinn, må sogningar som vil golfe reise til Hemsedal eller Jølster for å spele. Det likar ikkje Solheim.
– Når eg er på bana er det alltid folk der. Det regnar aldri på Ljøsne, og bana har ei nydeleg plassering ved Rikheim gard.
Tykkjer det er trist
Leiar i Lærdal golfklubb, Lorentz Petter Lassius, tykkjer det er synd at klubben mister golfbana.
– Det er jo alltid litt leit å miste eit område vi har brukt mykje. Vi har over der vi er no i over 15 år, og det er veldig gode forhold for å spele golf der, seier Lassius.
Ein av dei som var med på å starte golfklubben i Lærdal, Ingebrigt Gjerde, er svært lei seg over nedlegginga.
– Eg tykkjer det er sørgeleg. Golf er ein folkesport i Lærdal og i Sogn. Bana er veldig populær. Eg skulle nesten ønske at kommunen hadde kome på bana og sikra ei ordning. Det er veldig synd om vi må vekk.
Treng meir beite
Elisabet Rumohr eig garden og driv han i lag med mannen sin Frank Flatland. Ho seier at dei rett og slett treng meir beite.
– Vi vil satse på sau, og vi treng meir beite. Det er ikkje noko meir dramatikk i det, seier Rumohr.
Ho fortel at dei har gitt tydelege signal til golfklubben om at dei må finne seg ei ny plassering.
– Far min starta golfbana, men no har vi teke over. Vi ønskjer å satse som bønder. Vi har ei kontrakt ut 2019, den held vi oss til.