Dette vart markert utanfor rådhuset i Førde i dag, med eit arrangement i regi av Førde frivilligsentral, Førde kommune og Frisklivssentralen. For ein sykkelby må jo ha eigne syklar.
– Det er eit forsøk på å få folk til å sykle rundt i Førde sentrum i staden for å bruke bil. Kanskje spesielt for dei som brukar mykje bil her i sentrum, for dei kan faktisk sykle, seier Doris Rutledal i Frisklivssentralen.
Syklar til sykkelbyen
30 splitter nye dame- og herresyklar stod tysdag oppstilt på ei rekkje utanfor rådhuset i Førde. Og allereie denne dagen kunne folk låne syklane. Alt som måtte til var å fylle ut eit skjema med namn og nummer.
Svele, vaflar, «sykkelsmoothie» og kaker var også å få i tillegg til ein sykkeltur. Sjukepleiarstudentane Elisabeth Dale og Sarah Vatne var blant dei som stod for serveringa.
– Vi har eit emne som heiter helsefremjande og førebyggande arbeid. No er vi i praksis og er med Førde frivilligsentral og hjelper dei å arrangere denne sykkeldagen, seier Dale.
Det er mange gode grunnar til å ha eit slikt tilbod, meiner dei.
– Førde har som mål å bli ein sykkelby og no kan folk endeleg få lov til å låne sykkel gratis, seier Dale.
– Og no kjem det bommar til Førde, og då er det veldig viktig å satse på sykkel, legg Vatne til.
– Ikkje dårlege bysyklar
Heidi Karin Ekerhaug i Førde kommune har sjølv fått testa syklane.
– Det er kjempeviktig tiltak for folkehelsa, og det er viktig for at dei som ønskjer å sykle skal få moglegheit til det, seier ho.
Både ho og Rutledal i Frisklivssentralen håpar folk vil ta vare på syklane.
– Dette er ikkje dårlege bysyklar. Det er gode tursyklar, dei er dyre og spesialbestilt nettopp til Førde. Så vi håpar folk passar på dei, seier ho Rutledal.
Dei som ønskjer å låne sykkel på sommartid kan ta kontakt med Førde turistinformasjon. Elles på året vil syklane vere tilgjengelege på Frisklivssentralen, kanskje rådhuset, hotell og andre plassar som ønskjer å syklane ståande.