På dei to første konkurransane har florøværingen synt at han ikkje har gitt opp dette målet.
Under Florø Indoors Games laurdag sprang han 100 meter på 10,80, noko som stod til ein tredjeplass. På 60 meter stoppa klokka på 7,01. I Bærum førre helg sprang han 400 meter flatt på 48 sekund.
– Eg veit kor eg må ligge fartsmessig for å springe internasjonale tider på 400 meter hekk, og det er eigentleg akkurat her, seier Kjerpeset.
Har tru på at lukka snur
For det er på 400 meter hekk fokuset ligg på når han kjempar seg fram mot OL. I to år på rad har han satsa for å nå VM, men først sette ein mystisk fotskade stoppar for målet. I fjor gjekk han for hardt ut og trente rett og slett for mykje.
- Les også:
Men no ser alt mykje lysare ut, og 2016 kan bli året der alt snur.
– Vi har trent veldig hardt og det har gjeve gode resultat. Eg var veldig nøgd med 400 meteren førre helg, og når eg ser at treningskompisen min spring inn til noregsrekord med eit halvt sekund, så blir eg veldig positiv og håpar at eg kan gjere det same i løpet av nokre helger, seier Kjerpeset.
Og sjølv om OL-kravet til 400 meter hekk blir tøffare og tøffare, ser han lyst på at han skal klare å springe på under 49,30, og dermed få delta. Helst vil han springe på 49 blank.
– Om eg får trent skadefritt no fram til juni, så ligg eg veldig godt an. OL-kravet har aldri vore hardare, men eg skal angripe det offensivt.
Tilbake etter trøblete år
Også veslesøster Kristi Strømmen Kjerpeset (18) gjorde det sterkt under laurdagens konkurransar. Ho sette to personlege rekordar, med nesten to tidelar på 60 meter og tre tidelar 100 meter.
– Dette er ei kjensle eg har venta på i fem år snart. Eit skikkeleg overskot der eg kjenner at kroppen er klar og der eg spring over målstreken og kjenner at eg gav alt.
- Les også:
I 2013 fekk ho kyssesjuka og sleit med den i nesten halvanna år. Men det var tydelegvis ikkje nok, for i tillegg fekk ho ein solid skade i hamstring.
– Det har vore tungt å motivere meg og halde på når eg såg at kroppen ikkje fungerte som den skal. Men eg er veldig glad for at eg har gjort det. Det er ingenting som er så herleg som å vite at du har kome gjennom motgang.
No er målet hennar å vere med i medaljekampen i NM og kjempe i toppen i junior-VM.