Kritiserer Møre og Romsdal for å ville stå åleine som region

Nabofylket i nord er det einaste av vestlandsfylka som ikkje har delteke på storsamlinga i Bergen.

Her har fylkesutvala i Sogn og Fjordane, Hordaland og Rogaland blitt betre kjent og staka kursen vidare regionsamanslåingsprosessen på Vestlandet. Fylkesordførar Anne Gine Hestetun (Ap) i Hordaland rettar ein peikande finger mot fråverande Møre og Romsdal.

• Les også: Vil tvinge møringane med i vestlandsfylke

– Når arbeidsplassar og nye oppgåver skal fordelast, så ventar eg at vi som faktisk jobbar oss halvt i hel for å få dette til, får valuta for pengane, seier ho.

Avviser kritikken

– Eg finn meg ikkje i at vi skal gjere jobben og at dei skal prioriterast i stor grad. Regjeringa har sagt; finn saman og løys oppgåvene, så skal de bli høyrde. Sogn og Fjordane, Hordaland og Rogaland skal bli høyrde om vi finn saman i ein intensjonsavtale. Så ynskjer eg Møre og Romsdal all lykke til, legg Hestetun til.

For fylkespolitikarane i Møre og Romsdal har bestemt at fylket skal gå samla – og åleine – inn i framtida.

• Les også: Difor vil Stig Olav ha sunnmøringane sørover

– Alle andre alternativ vil dele Møre og Romsdal. Det ynskjer vi ikkje å gjere, svarar fylkesordførar Jon Aasen (Ap).

Fryktar splitting

– Alle veit at dersom Møre og Romsdal skal vere med i ein vestlandsregion, så må vi med opne auge dele eit fylke som har all moglegheit for å gå åleine gjennom regionreformen. Du vil nok få med deg Sunnmøre sørover, men aldri Romsdal og Nordmøre, legg Aasen til.

• Les også: Set seg i førarsetet for regionreformen

Fylkesordførar Jenny Følling (Sp) i Sogn og Fjordane fryktar at Regjeringa kan gi Møre og Romsdal delar av Sogn og Fjordane i premie – sjølv om dei står utanfor Vestlandsfylket.

– Vi er opptekne av at Sogn og Fjordane står samla. Vi har samtalar sør for oss, men døra står også open nordover. Vi går dit vi får dei beste avtalane, og der vi har moglegheit til å vinne fram med å få nye arbeidsplassar, seier Følling.

Vil ikkje bli større

– Vi kjem i alle fall ikkje til å ta med oss nordfjordkommunar inn i Møre og Romsdal for å ta eit jafs nedover i Sogn og Fjordane. Det vil berre skape uro i Møre og Romsdal, så det er uaktuelt, svarar Aasen.

Han er også skuffa over at Følling gir uttrykk for at Møre og Romsdal ikkje har respondert på invitasjonen til å bli med i eitt Vestlandsfylke.

• Les også: Drøymer om ein Vestlandsgigant

– Vi har hatt nabosamtale med Sogn og Fjordane. På Nordfjordeid presenterte vi vårt vedtak i fylkestinget, som seier at vi ynskjer å gå ut av reforma som eige fylke.