No knivar Erna og Jonas om Vestlandet

– Vi skal brette opp erma og jobbe hardt. No må vi vise folk kva vi har fått til dei siste fire åra, seier Erna Solberg.

I dag har ho køyrd båt langs kysten av Sogn og Fjordane og prata med partifolk og vellukka bedrifter. Bodskapen hennar har vore at det no går betre på vestlandskysten.

– Reiselivsnæringa går bra, og havbruksnæringa går bra. Næringslivet har vore dyktige til å omstille seg, og vi har lukkast i å stimulere til vekst med målretta tiltak, seier Solberg.

• Les også: Her møter statsministeren Linea og Svein Ove

Har mista vestlandsmandat

Om ein ser på meiningsmålingane, kan ein kanskje forstå kvifor statsministeren vel å vise seg fram på Vestlandet. Høgre ligg an til å miste to mandat i Hordaland og eitt i Sogn og Fjordane, samanlikna med valet for fire år sidan.

– Men om ein går åtte år tilbake i tid, så ligg vi ganske bra an. Likevel trur eg vi kan klare å løfte oss inn mot valet. No begynner folk å sjå at nokre av dei endringane vi har gjennomført fører til betre tenester.

Les også: Støre innrømmer at Ap ikkje har gjort nok for Vestlandet

– Skapar ikkje nok jobbar

Men også Arbeidarpartiet varslar i dag at dei set inn støyten på Vestlandet. Og Jonas Gahr Støre meiner at regjeringa ikkje har gjort nok.

– Eg var på Vestlandet i går. Nokon bedrifter går det bra med, men gjennomgangstemaet er at det blir ikkje skapt nok jobbar, seier Støre.

Han meiner regjeringa sin politikk ikkje har verka og at arbeidsløysa går opp. Sjølv om det går bra både i fiskerinæringa og reiselivsnæringa, ifølge statsministeren.

– Vi svartmålar ikkje, men det blir skapt for få arbeidsplassar, og regjeringa sin politikk fører ikkje til fleire, seier han.