– Talet er jo altfor, altfor høgt. Vi klarar berre å ta toppen av isfjellet

– Talet er jo altfor, altfor høgt. Vi klarar berre å ta toppen av isfjellet, seier Einar Vereide.

Han og kollegaene hans i Utrykkingspolitiet i Vest politidistrikt stoppa torsdag ei mengde bilistar på vegane. Alle sjåførane må blåse for å vise om dei hadde rus i blodet.

– Her var det 0,0, les Vereide av på målinga frå ein av sjåførane som blei stoppa på riksveg 5 i Sunnfjord.

At det denne veka er ekstra mange promillekontrollar langs vegane, og er ikkje tilfeldig.

Aksjon i Europa

UP og politidistrikta i landet, samt politi andre stadar i Europa, set denne veka fokus på å førebygge og å avdekke ruspåverka køyring. Målet er å redusere talet på drepne og skadde på norske vegar.

– Rus er ofte ein medverkande årsak i dødsulukker i trafikken. Difor er det veldig viktig å prøve å luke ut desse sjåførane, forklarar Vereide.

Statistikk frå Folkehelseinstituttet syner at det dagleg skjer 140.000 køyreturar med sjåfør i rusa tilstand.

Talet på registrerte meldingar om køyring i ruspåverka tilstand til politiet hittil i år er 8.728. 2.150 av desse vart meldt inn av UP. Dette viser tal NRK har fått frå utrykkingspolitiet sentralt.

Flest blir tekne «dagen derpå»

Med julebordsesongen godt i gong, er det er ikkje tilfeldig at denne aksjonen kjem i førjulstida.

Halvparten av dei som blåser raudt på alkohol har låg promille, og blir tekne mellom klokka åtte og eitt på føremiddagen, ifølge tal frå UP Vest.

• Les meir: Køyrde fire mil med ein promille på 2,27

– Folk trur dei er edru i totida, men då har dei gjerne heldt på så lenge at dei har gløymt dei siste glasa dei tok og då blåser dei raudt likevel, seier Vereide.

Konsentrasjonen av bilistar som blir tekne med høgare promille, er størst rundt midnatt.

Meir målretta

Terje Oksnes, distriktsleiar i UP Vest, fortel at tala deira på landsbasis viser at UP finn éin ruskøyrar per 190 stogga bilførar i 2017.

Dette er ei stor oppgang frå i fjor då talet var éin bilist per 290 stogga.

Oksnes meiner UP er blitt flinkare til å jobbe målretta med å stogge dei rusa trafikantane.

– Vi har eit register som viser statistikk på kva tid folk avslører si eiga ruskøyring, då dei enten køyrer i grøfta, kolliderer eller det blir meldt frå andre trafikantar som opplever køyring deira som mistenkeleg, forklarar han.

– Ut ifrå statistikken planlegg vi kontrollar på dei tidspunkta kor den mest trafikkfarlege rusen er på hjul.