– Det er veldig viktig at barna kan få hjelp der dei bur. Dette er ei veldig god nyheit for alle dei sårbare barna i fylket vårt, seier Linda Åmelfot som er familievaldskoordinator i politiet i Sogn og Fjordane.
Ho har i mange år jobba med barn som blir utsette for eller blir vitne til vald og overgrep. Når desse barna skal fortelje om opplevingane må dei i dag reise til anten Bergen eller Ålesund, der det i dag finst såkalla barnehus.
For mange har den lange reisa blitt ei ekstra belastning.
– Det er mange år sidan vi gjekk ut i media og bad politikarane kome på bana for dette tilbodet. Det har vore ein kamp, og vi er veldig glade for at det no kjem på plass, seier Åmelfot.
- Les også:
- Les også:
– Avhøyr har blitt prega av lang reiseveg
Kommunane, KS, fylkeskommunen, politiet, Helse Førde, Sunnfjord og Ytre Sogn interkommunale legevakt og Statens barnehus i Bergen er blant aktørane som har engasjert seg i arbeidet med å få på plass eit eige barnehus i Sogn og Fjordane.
Alle har vore samde om at det er nødvendig med ei betre løysing for å sikre at avhøyr og rettsmedisinske undersøkingar av overgrepsutsette barn kan skje i heimfylket.
I dag kunne justisminister Per-Willy Amundsen gje endå fleire gode nyheiter til blant anna stortingsrepresentant Frida Melvær (H). I morgon gir han politiet signal om å starte prosessen med å etablere avdelinga i fylket.
– Ein har opplevd at oppfølginga av barna blir prega av den lange reisevegen. Barna kan bli trøytte eller bilsjuke og det påverkar avhøyra, seier Melvær.
- Les også:
– Ein siger for barna
Planen er at barnehuset skal etablerast i lokale på legevakta ved Førde sentralsjukehus, og målet er at det kan opne i løpet av hausten.
Stortingsrepresentant Tore Storehaug (KrF) meiner det er ein siger for heile fylket at politikarane og andre aktørar har klart å vinne fram ved å jobbe på lag.
– Det er ei glede for alle oss. Men først og fremst er det ein siger for barna som slepp krevjande reiser for å ta del i prosessar som i utgangspunktet er krevjande.
Også KS-leiar Harald Offerdal er svært glad.
– Barn og unge i Sogn og Fjordane har rett til den same rettstryggleiken som andre barn, utan større belastning enn andre. Lange reiser til barnehus utanfor fylket skapar unødig uro og meirbelastning i ein allereie sterkt belastande situasjon for ei sårbar gruppe.