No er det snart tomt for fôr

Fjoråret skriv seg inn i historia som eitt av dei verste for bøndene på Vestlandet på lenge. Isbrann og lange kuldeperiodar førte til store skader på avlingane, og berre i Sogn og Fjordane vil det bli utbetalt 10 millionar kroner i erstatning for avlingssvikt.

• LES OGSÅ: Fjoråret vart dramatisk for bøndene - aldri har dei fått så mykje i erstatning

Alf Steinhovden driv Vestfôr AS i Eikefjorden, og har drive med kjøp og vidaresal av grovfôr i 20 år. Aldri før har han opplevd ein etterspurnad som denne vintersesongen, og allereie no ser han det an til at det vil gå tomt.

– Frå juli i fjor til mai i år vil eg ha fått køyrt hit rundt 400 lass med fôr, og då greier eg ikkje skaffe meir. Eg har mykje fôr i bestilling, men no må vi ta atterhald om at vi ikkje greier skaffe nok.

– Nokre fôrtypar er vi allereie heilt tomme for, seier han.

Fortvilte bønder over heile Vestlandet

Alf Steinhovden er sjølv gardbrukar, og i sauefjøsen i Eikefjord har han sjølv greidd å få nok fôr i hus. Men mange bønder opplevde fjoråret som eitt av dei tøffaste på svært lenge, der dårleg vêr øydela for avlingane.

Mange bønder har måtte slakte ned delar av buskapen sin for å kome seg gjennom vinteren, og det har blitt kjøpt fôr frå Austlandet og Sverige for fleire millionar kroner.

• LES OGSÅ: Alf trålar både Austlandet og Sverige for å skaffe Vestlands-bøndene fôr
• LES OGSÅ: Fôrmangel går utover lønsemda

Alf Steinhovden har vore i kontakt med mange bønder dei siste månadane. Dei fortel om fortvilande situasjonar.

– Eg har stor medkjensle for dei som måtte jobbe store delar av sommaren for å fornye enga si, seier fôrseljaren.

(Artikkelen held fram under)

Må hente resten i Sverige

Mange av bøndene han har levert fôr til denne sesongen er mangeårige kundar. Den største skilnaden er mengda dei bestiller. Store samdrifter har bestilt fire-fem lastebillass åleine.

Når vi no har bikka februar får ikkje Steinhovden tak i meir for frå Austlandet, og han jobbar no primært opp mot fôrprodusentar i Sverige.

– Det er svært lite att på Austlandet, og det er no i Sverige eg jobbar for å sikre meg nye parti.

– Har du opplevd før at det byrjar bli tomt på Austlandet allereie no?

– Vi har aldri hatt ein slik situasjon før. Det skuldast det store behovet for fôr på heile Vestlandet, og til dels også i Nord-Norge og andre stader, seier han.

• LES OGSÅ: Aldri før har så mange søkt om erstatning etter avlingstap
• LES OGSÅ: Førsteslåtten gav Karina berre halvparten så mange rundballar som vanleg - fryktar ekstrem fôrmangel
• LES OGSÅ: Bøndene frykter fôrmangel