– Vi er i rute, men no skal vi skal vi heller ikkje gjere så mykje arbeid på anlegget, som vi gjorde før stemnet i 2008. Slik sett er det enklare for oss å kome i mål denne gongen, seier Christian Rekkedal, som er leiar for hovudkomiteen for Landsskyttarstemnet i Førde 2017.
I månadsskifte juli/august neste år kjem nær sagt det som kan krype og gå av aktive skyttar til Førde. Sist var det 5000 påmelde skyttarar. I løpet den veka arrangementet går føre seg reknar Rekkedal med at dei kjem til å doble talet på innbyggarar i Førde.
– Det er stort. Ordføraren i Førde har sagt at Landsskyttarstemnet skal verte vårt OL. Først tenkte eg at det var litt voldsomt, men etter å ha sjekka litt fann eg ut at det er færre enn 5000 deltakarar på eit vinter OL, seier Rekkedal.
Nøgd med førebuingane
Torsdag var det Frivillige Skyttarvesen på synfaring for å sjå at alt går slik det skal.
– Det er veldig bra. Førde er generelt flinke til å planlegge arrangement. Dei har vore flinke til å gjennomføre, og eg meiner dei er godt i rute. Eg er sikker på at dette er i trygge hender, seier Jarle Tvinnereim, som er generalsekretær i det Frivillege Skyttarvesen.
Han peikar på at Førde leverte eit veldig godt arrangement i 2008. Den gongen sørga vêret for at det vart ei flott ramme rundt skyttarstemnet.
– Etter mi meining var det eit av dei beste Landasskyttarstemna som har vore leverte, seier Tvinnereim.
Treng husrom
Ei av dei store oppgåvene for arrangørane bli å skaffe god overnatting til alle som kjem.
– Det største grepet vi gjer, er at vi opprettar ein skyttarcamp. Førre gong laga vi ein mellombels camping for 900 campingvogner, seier Rekkedal.
I tillegg så formidlar dei også utleige av hus for dei som ynskjer å leige vekk huset sitt i samband med Landsskyttarstemnet.
– Vi er glade for alle som legg til rette for overnatting, for det er viktig at alle dei som kjem til Førde får gode overnattingstilbod. Vi har eigentleg meir enn nok med å gi gode tilbode til dei som skal vere på campen, seier Rekkedal.
