Inger Anne Frøysedal tok gull i tresteg og var berre seks centimeter frå ein bronse i lengde under friidretts-NM i helga.
LES OGSÅ:
Torer å tenkje mot OL
Med det vart ho den einaste utøvaren frå Sogn og Fjordane med gull - og ho forsvarte samstundes gullet frå 2009.
No torer ho også å drøyme om å delta i OL.
- OL er sjølvsagt eit mål for alle som driv med friidrett. Eg seier ikkje at eg skal dit, men eg har eit mål om det - ein draum, seier Frøysedal.
- Snakkar vi allereie i 2012?
- Ja, om det er mogleg, så...
(Artikkelen held fram under biletet)
Satsar tøft på idrett og skule
Frøysedal deltok i sommar for første gong i EM, der ho vart nummer 21.
I Norge har ho utvikla seg til den store einaren i tresteg.
I tillegg går ho på det tøffe veterinærstudiet, og har nok å henge fingrane i om dagen.
- Eg får ikkje gjort så mykje ved sidan av skule og trening. Det tek mykje tid, seier 21-åringen.
Må halde seg unna skader
Neste år satsar nordfjordingen mot U23-EM, der ho har gode sjansar til å hevde seg. For etter at ho flytta til Oslo for å satse på idretten sin i ein alder av 16 år, har ho jamt nærma seg dei aller beste.
I sommar har ho dessutan vore over den norske rekorden i tresteg - men i for sterk medvind til at hoppet vart godkjend som norgesrekord.
Skal ho til OL, må ho halde fram den gode utviklinga.
- Eg må iallfall ha ein kontinuerleg treningsperiode og halde meg skadefri. Eg trur det er lurt å ta dei små stega, slik at ein ikkje tek alt på ein gong og blir skadd, seier Frøysedal.