Laurdag spelte Førde Volleyballklubb seg til siger under Nordic Club Championship, og er dermed nordiske meistrar. Men dei kviler ikkje lenge på laurbæra.
- LES OGSÅ:
Allereie dagen etter byrjar planlegginga av nye mål. For trenar Frank Roger Kalstad hadde trua på siger, lenge før den avgjerande kampen vart spelt.
Trudde på siger
– Det var heilt fantastisk å vinne denne turneringa. Men vi hadde tru på det i forkant også. Vi såg på Marienlyst som det sterkast laget, og dei tapte vi knepent mot i innleiinga. Eg meiner vi er eit sterkare lag no, enn då vi trefte dei sist.
Førde-spelar Nils Numme markerte seg under meisterskapen. Med heile 78 poeng var han den desidert beste spelaren.
Han meiner slagordet dei hadde valt før turneringa, gav dei sigeren.
Motto: «aggressivitet»
– Det hadde med mottoet vårt å gjere. Nemleg aggressivitet. Vi gjekk på med eit stort engasjement, og tenkte ikkje så mykje på konsekvensane. Det trur eg var veldig viktig, for at det gjekk som det gjekk.
– Det verkar som ein dristig strategi?
– Ja, men det funka, humrar Førde-spelaren.
Å vinne den nordiske meisterskapen var eit langsiktig mål for klubben i deira fireårsplan. Men dei nådde det allereie i det fyrste året. No vil trenaren setje seg større mål, og gjere laget endå betre.
Bra, betre, best
– Det som er viktig for meg er at vi stadig vekk forbetrar det sportslege tilbodet vi har i klubben. At vi trenar betre, at vi prøver å knytte til oss gode spelarar, og at vi held fram med å rekruttere unge, lovande.
– De er akkurat blitt nordiske meistrar. Kor mykje betre kan de bli?
– Det er alltid mogleg å bli betre. Den dagen vi sluttar å ha som mål å bli betre, vil vi få eit stort problem.
Pirrande siger
– Stabiliteten i spelargruppa er ei utfordring for ein klubb som Førde. Dessutan må vi bli meir profesjonelle. Skal ein bli betre må ein ha ressursane til å gjere det.
Kva inntekter som kan kome ut av helgas siger, er trenaren usikker på. Men han håpar prestasjonane kan pirre nokon til å ville satse på deira «produkt».
– Du etterlyser sponsorar?
– Vi har mange, og gode sponsorar. Men vi må alltid søkje fleire moglegheiter, seier Førde-trenar Frank Roger Kalstad.