– Det var herleg at alle gjekk so gode etappar, seier Håvard Gutubø Bogetveit.
Det er første gong Sogn og Fjordane tek medalje i NM-stafetten, og då slo dei til med det edlaste metallet.
– Det var moro å klinka til med overlegen siger.
Overlegne
Sogn og Fjordane var rett og slett overlegne. Jarle Midthjell Gjørven gjekk første etappe og veksla som nummer 7. Johannes Thingnes Bø gjekk førstelaget til Sogn og Fjordane opp til ein 2. plass på andre etappe.
Tredjemann ut var Håvard Gutubø Bogetveit som veksla først på 3. runde. Då overtok Tarjei Bø som heldt leiinga heilt til mål. Alle fire på laget skaut feilfritt under stafetten.
Sogn og Fjordane-laget vann med 01:23,6 føre Nord-Østerdal SSK 1 som kom på 2. plass.
– Det er kult å sjå at alle hadde ein kjempebra dag, og eg var faktisk litt overraska over at me vann med so mykje. Eg hadde trudd det skulle bli vanskeleg med gull, men at medalje var innan rekkjevidd, seier Gutubø Bogetveit.
Sjarmøretappe på Bø
Gutubø Bogetveit sendte Tarjei Bø ut på sisteetappen med om lag 20 sekund forsprang. Dermed vart det ein sjarmøretappe for Bø.
– Me hadde håp om å vera under eitt minutt bak leiinga før han gjekk ut for å ha håp om å vinna. So då han gjekk ut 20 sekund framfor nummer to, var eg sikker på at dette gjekk vegen.
Sogn og Fjordane vann også mix-stafetten i junior-NM tidlegare i vinter og sølv i junior-NM på herrestafetten. Det vitnar om at skiskyttarane frå fylket hevdar seg over tid.
– Det er kult at vesle Sogn og Fjordane gjer det so bra. Oslo og Akershus har mange, mange fleire utøvarar, so det er tøft at me syner oss fram på denne måten.
2. laget til Sogn og Fjordane enda på ein 26. plass. På laget gjekk Ole Martin Erdal. Johan Eirik Meland, Lars Midthjell Gjørven og Anders Vonheim.