Nina (17) er den første norske juniorspelaren i VM i biljard på åtte år

– Eg byrja å spela biljard etter at vi var på klassetur hit då eg var 14 år. Eg syns det var kjekt, og då melde eg meg inn i klubben, seier Nina Torvund.

17-åringen har spelt biljard i vel tre år. På dei åra har ho tatt fleire medaljar i NM og i sommar vart ho Europameister. Det har gjort til at det europeiske forbundet har tatt ho ut til å representere Europa i junior-VM i Moskva som startar på måndag.

Ho har gått frå nybegynnar til VM-spelar på tre år. Det kan ho takka sitt eige talent, eldsjeler og eit unikt miljø for.

200 medaljar

At Hyllestad biljardklubb tar NM og EM-medaljar er naturstridig. Kommunen har i underkant av 1400 innbyggjarar og har blant dei dystraste framtidsutsiktene til folketalsutvikling, ifølge SSB sine prognosar.

Likevel har dei tatt over 200 medaljar i NM sidan den første i år 2000 og av dei er 48 gull. Den 100. medaljen kom i 2015 – den 200. i sommar.

– I Hyllestad var det fleire eldskjeler som starta opp. Det var fleire som var interessert i få det til og det har dei absolutt klart, seier Robert G. Rysjedal, president i Norges Biljardforbund.

I tillegg til alle NM-medaljane har dei tatt 13 medaljar i EM. Av dei er eitt gull, som Nina Torvund tok i sommar. Og no er VM neste mål.

– Eg håpar jo på medalje. Kanskje gull, seier Torvund som denne helga er i Stockholm for å gjere dei siste førebuingane før VM-starten måndag.

For å vera best mogeleg budd til VM køyrde tidenes norske biljardspelar, Vegar Kristiansen, tur-retur Trondheim-Hyllestad for to dagar med intensiv trening saman med Torvund.

– Gjennom prosjektet Team Norway reiser eg rundt og hjelper dei unge spelarane med små detaljar. Det er betre at eg bruker nokre timar på å fortelja dei korleis dei skal gjera ting, enn at dei gjer som meg og kastar vekk 15 år på å finna det ut sjølv, seier Kristiansen, som var i Hyllestad for to veker sidan.

Oslo mot Hyllestad

I biljardtoppen i Noreg er det to klubbar som dominerer. Vesle Hyllestad og Oslo biljardklubb.

I Oslo har dei like mange aktive spelarar som Hyllestad har innbyggarar under 50 år.

– Sjølv om det er rivalisering mellom klubbane har vi ein god tone. Det dei har fått til er imponerande med tanke på kor få dei har å rekruttere frå samanlikna med oss, seier Thomas Stavang Pedersen som er leiar i Oslo Biljardklubb.

I Noreg er biljard ein liten sport, men ute i verda har sporten større status. Eit av tiltaka Biljardforbundet no jobbar med er å bli ein del av NM-veka som samlar fleire småidrettar til eit felles NM, som også vert TV-sendt.