NHO-direktør Jan Atle Stang meiner at for mykje byråkrati i for mange kommunar bremsar ein heilt naudsynt vekst i fylket.
– Vi må få færre kommunar, større og meir kompetent fagmiljø og meir effektivitet i dei kommunale administrasjonane. Det er den einaste løysinga, og utruleg viktig for næringslivet, slik at ein kan setje full fart framover, seier Stang til NRK.
– Kunstige barrierer
Resultatet av NHO sitt såkalla kommune-NM er nedslåande lesing for mange kommunar her i fylket.
Om ein ser vekk frå fylkessenter som Førde og Sogndal, samt satsande industrikommunar som Gulen, havnar vi midt på treet på dei fleste statistikkane. Jan Atle Stang meiner at ikkje minst fylkesgrensene er kunstige barrierer for næringsutvikling.
– Fylkeskommunen er eit begrep i Sogn og Fjordane som ein ikkje finn i mange andre område i landet. Eg trur det har vore vore og er eit hinder for korleis vi kan tenkje fritt for kva som gjev dei beste løysingane, meiner Stang.
- LES OGSÅ:
Vil mjuke opp grensene
Senterpartiet har tradisjonelt sett vore ein forkjempar for å halde på fylkeskommunen og fylkesgrensene slik dei er i dag. Men Senterparti-ordførar i Gulen, Hallvard Oppedal, meiner at ei løysing med større regionar ville vore ei betre løysing.
– For Gulen sin del så hadde det vore ein fordel med større regionar. Grensa kjem jo ein plass då også, men vi hadde sett veldig fram til det. Det er jo veldig naturleg for oss å samarbeide, og særleg med Masfjorden som ligg i Hordaland. Vi har eit felles næringsselskap med Masfjorden til dømes, og det fungerer veldig godt.
Utkantkommunen Gulen har i dag eit sterkt veksande industriområde i Sløvåg og Skipavika, og er den største havbrukskommunen i Sogn og Fjordane.
– Ei klassisk felle
Men fylkesordførar Åshild Kjelsnes meiner det er for tidleg å ta debatten om fylkesgrensene og fylkeskommunen si framtid no.
– Eg føler at vi no er i ferd med å gå i ei litt klassisk felle, der ein blir veldig oppteken av grenser, storleik og trur at det skal skape effektivitet. Så gløymer ein eigenleg oppgåvene. Eg meiner det er alt for lite fokus på kva som skal vere på dei ulike nivåa. Før ein har lagt det meir tydeleg fast, så er det eigentleg litt prematurt å snakke om kva som er den rette fasiten med grensene.
Men Gulen-ordførar Hallvard Oppedal er klinkande klar i sitt syn:
– Ein må få ei oppmjuking av dei grensene, det er det som er viktig tykkjer eg, seier Oppedal.