Det seier tidlegare Fjord1-toppsjef Dagfinn Neteland som i desember i fjor, saman med styreleiaren i ferjeselskapet, gjekk av i protest mot fylkestinget sitt vedtak.
– I dag trur eg fylkespolitikarane angrar på at dei ikkje høyrde på kva eg sa, seier han.
Med ei røyst i overvekt vedtok fylkespolitikarane å selje aksjeposten sin i Fjord1, eit sal som frå første stund har vore svært omstridd og eit sal som Konkurransetilsynet nyleg sa nei til.
- Les også:
Vondt blod
Supply-reiar og minoritetseigar i Fjord1, sunnmøringen Per Sævik, har heile tida hevda at han har forkjøpsrett på fylkeskommunen sin aksjepost. Han har saksøkt fylkeskommunen og rettssaka er sett opp i slutten av august.
– Fylkeskommunen ville unngått mykje vondt blod og turbulens ved å ha lytta til dei fornuftige råda vi gav. Saka er veldig trist, seier Neteland.
– Er det ikkje etterpåklokskap du kjem med her?
– Nei, på ingen måte. Eg sa heile tida at det ville vere svært vanskeleg å få gjennomført fylkeskommunen sine planar.
Dagfinn Neteland (t.v.) er ikkje nådig i kritikken mot fylkestinget som vedtok å sele Fjord1-aksjane til Torghatten.
Foto: Grete Roska / NRKSjølv om fylkeskommunen sitt salsvedtak no er overprøvd av Konkurransetilsynet, angrar ikkje Neteland på at han trekte seg.
– Nei, det gjer eg på ingen måte. Slik situasjonen var, hadde vi ikkje noko val, seier han.
- Les også:
Provosert
Fylkesordførar Jenny Følling (Sp) er tydleg provosert over kritikken frå Neteland, men i intervjuet med NRK er ho rund i formuleringane.
– Fylkestinget valde det beste økonomiske tilbodet med den beste aksjonæravtalen som ville sikra hovudkontor i Florø. Så er det slik at Konkurransetilsynet også måtte godkjenne ein eventuell fusjon med Norled, seier ho.
– Men kva kommentar har du til den harde kritikken frå Neteland?
– Vedtaket i fylkestinget vart gjort etter ein grundig prosess som har gått føre seg i to år. Saka skal opp i fylkesutvalet den 3. august, seier Følling som ikkje vil gje ytterlegare kommentarar.
Fylkesordførar Jenny Følling ønskjer ikkje å svare på om ho angrar på at Fjord1-aksjane vart selde til Torghatten.
Foto: Noralv Pedersen / NRK- Les også:
Meiner Sævik må få kjøpe aksjane
Det einaste fornuftige for fylkeskommunen vil vere å selje aksjeposten sin til Per Sævik, meiner Neteland.
– Fylkespolitikarane har vedteke at dei ønskjer å selje og Sævik ønskjer å kjøpe. Det beste vil vere at partane blir samde. På den måten vil ein også unngå ei vond og opprivande rettssak, seier Neteland.
Jenny Følling ønskjer ikkje å kommentere om det kan vere aktuelt å selje Fjord1-aksjane til Sævik.
