Nordfjordrådet avviser Volda som lokalsjukehus for nordfjordingar

Fleirtalet i Nordfjordrådet seier nei til at sjukehusa i Volda og på Nordfjordeid blir slått saman til eitt lokalsjukehus. Det kom fram på eit møte i Nordfjordrådet i går, og er stikk i strid med tilrådinga frå helsefaggruppa i Nordfjord.

– Dette var berre eit orienteringsmøte der vi ikkje skulle fatte noko vedtak. Men det var usemje mellom ordførarane i Nordfjord på møtet, fortel ordførar i Hornindal og leiar for Nordfjordrådet, Anne-Britt Øen Nygård.

Fleirtalet i Nordfjordrådet vil heller vente på eit anna forslag om eit nasjonalt prosjekt «Framtidas lokalsjukehus», men som Helserådet meiner ikkje kjem til å redde situasjonen.

• LES OGSÅ: – Sjukehus i Volda og Nordfjord bør bli til "fjordane sjukehus"
• LES OGSÅ: Vil sende pasientane til Volda

Heilt naturleg å velje Volda

Anne-Britt Øen Nygård er ei av dei som har gjeve klart signal om at dei bør gå inn for ei utvikling av «Helse Volda og Nordfjord HF». Ho meiner også at dersom dei har tenkt å bruke Volda, så må dei gi signal om det.

– Hovudpoenget til dei andre i Nordfjordrådet er at dei støttar opp om Nordfjordeid sjukehus, dei vil i allefall vente og sjå kva som kjem på Eid.

Hornindal kommune vil bruke Volda som lokalsjukehus, ifølgje Øen Nygård.

– Når Kvivsvegen opnar vil det ta kring 25 minutt til Volda, og 2,5 time til Førde. Så det valet er heilt naturleg, ein må tenke på kva som er det beste for pasientane, fortel Øen Nygård.

• LES OGSÅ: Helseføretak vil ikkje ha Nordfjord
• LES OGSÅ: Ønskjer folkerøysting om kva fylke Eid skal tilhøyre i framtida

– Feigt og kortsiktig

Bengt Georén sit i helsefaggruppa i Nordfjord, og er ein av dei som har oppmoda Nordfjordrådet til å gå for forslaget om «Helse Volda og Nordfjord HF». Han er også svært skuffa over at Nordfjordrådet går i mot oppmodingane.

– Helse Førde kjem til å vekkprioritere Nordfjord sjukehus heilt og haldent, så eg meiner dette er svært kortsiktig tenking av Nordfjordrådet, og også litt feigt, seier Georén.