Under landsmøtet i dag var Meltveit Kleppa full av lovord om avtroppande partileiar Liv Signe Navarsete. Dei to har samarbeida tett gjennom eit langt liv i politikken.
– Liv Signe har vist eit formidabelt engasjement og ein eigen evne til å stå på, som har smitta over på oss andre, seier Meltveit Kleppa.
(Artikkelen held fram under biletet)
Trur ikkje politikken blir gløymt
I opptakten til landsmøtet har det meste dreia seg om personstriden mellom avtroppande partileiar Liv Signe Navarsete og nestleiar Ola Borten Moe.
Kleppa er ikkje redd for at dette skal overskygge innsatsen Liv Signe Navarsete har gjort for distriktspolitikken, kommuneøkonomien og samferdsla i landet.
– At ho då har hatt ei ukontrollert utblåsing no og då, det skulle berre mangle med det temperamentet ho har, men det er ikkje det vi vil hugsa Liv Signe for, seier Kleppa.
No meiner ho partiet må nytte høvet til å samla seg om dei politiske sakene.
– Her er ein landsmøtesal full av aktive folk. No må alle brette opp ermene og stå på vidare, sa Meltveit Kleppa.
(Artikkelen held fram under biletet)
Navarsete held fram i politikken
Frå talarstolen forklarte Navarsete seg tidlegare på dagen om kvifor ho følte det var rett å trekke seg.
– Å skulle klamre meg fast til makta er ikkje min stil. Eg gjorde det av kjærleik til partiet. Stadige angrep frå ulikt hald svekka meg som leiar, sa Navarsete frå talarstolen.
Navarsete sa også at ho ønskjer å halde fram som folkevald stortingspolitikar frå Sogn og Fjordane.
- LES OGSÅ:
Magnhild Meltveit Kleppa tykkjer det er trist at Navarsete går av, men tek godt imot meldinga om at ho held fram i politikken
– Det er klart det er vemodig, både for Liv Signe og for alle som har stått henne nær. Samtidig er det veldig bra at ho har sin plass i stortingsgruppa. Vi kjem til å høyre mykje frå ho også i framtida, seier Meltveit Kleppa.
– Sognerøtene ikkje årsaka til turbulensen
Harald Stanghelle, politisk redaktør i Aftenposten, seier karrieren til Liv Signe Navarsete har vore prega av både opp- og nedturar.
– Det har vore gjennomslag for Sp-politikk på svært sentrale område, ikkje minst på veg og landbruk. Samstundes har det vore ei vanskeleg tid for partiet. Ikkje minst dei siste månadane, med sterk strid, seier Stanghelle.
Navarsete sjølv trekte fram det at ho er sogning, fritalande og med stort temperament, som årsaker til all turbulensen rundt ho som person. Stanghelle er berre delvis einig.
– Det er i alle fall ikkje det at ho er sogning som gjer at ho må trekka seg. Men ho har hatt ein leiarstil som nok har provosert ein del. Ho har ikkje lagt skjul på at temperamentet hennar kunne løpe av med henne. Det har nok skapt meir turbulens enn naudsynt innanfor Senterpartiet.
Men han trur ikkje at all skitkastinga den siste tida vil svekke ettermælet til den avtroppande leiaren.
– Det kastar lange skuggar akkurat no. Men all erfaring tilseier at dei bleiknar i historias lys, seier Stanghelle.