Statens vegvesen skal arbeide vidare med finansiering av Dalsfjordbrua i tråd med tidlegare prioriteringar i Sogn og Fjordane fylkeskommune, skriv samferdsleministeren i ei pressemelding. Dette vil seie at arbeidet skal skje med sikte på anleggsstart i 2009, seier Liv Signe Navarsete.
Liv Signe Navarsete i statsrådstolen. Foto: Cosmin Cosma, NRK
Olden - Innvik
Då Bondevik-regjeringa kom med sitt framlegg til statsbudsjett, hadde tidlegare samferdsleminister Torild Skogsholm overprøvd vedtaket i fylkestinget. Ho ville ha fram riksveg 60 mellom Olden og Innvik, mellom anna etter innspel frå leiar Rolf Nesheim i Sogn og Fjordane Venstre. No slår Navarsete fast at prioriteringa til fylkestinget står fast.