- Ho har kjempa som ei løve for distrikta

– Liv Signe har vore viktig for fylket. Ho har vore tett på sakene, og det er mange saker ho har hatt si hand på. Ho er den stortingspolitikarane som har hatt størst påverknad, så vidt eg kan sjå, seier Jenny Følling.

Etter mykje uro både internt i og kring partiet, gjekk partileiar Liv Signe Navarsete laurdag ut og annonserte at ho vil sleppe til nye krefter i leiarrolla.

• LES OGSÅ: Liv Signe Navarsete varsler sin avgang

(Artikkelen held fram under)

– Eg har gått gjennom den samla situasjonen i partiet. Det er viktig at vi no kan få fokuset tilbake på politikk og klarar å skape ro. Det har vore for mykje uro, og eg trur det kan vere greitt med nye kostar no, sa Liv Signe Navarsete til NRK.no umiddelbart etter at ho hadde varsla sin eigen avgang.

Navarsete har vore leiar i Senterpartiet i åtte år.

Framheva som distrikta si røyst

Følling meiner spesielt distrikta står i fare for å miste ei viktig røyst.

– Liv Signe har kjempa som ei løve for distrikta. Med ho som leiar har partiet gjort det godt i regjeringa. Det er behov for eit Senterparti som kan snakke distrikta si sak mot ei blåblå regjering. Så det er viktig å få på plass ein organisasjon som fungerer, og legge andre stridar bak seg, seier Følling.

• LES OGSÅ: Overraska over Navarsete sitt val

Også valkommentator for NRK Sogn og Fjordane, Knut Henning Grepstad, meiner det er innsatsen for distrikta Navarsete vil bli hugsa for.

– Det er mange konkrete enkelt saker i Sogn og Fjordane ho har arbeidd for, og ho har teke initiativ på mange området. Som samferdslestatsråd tok ho initiativ til å få planar i gong, og konkrete løyvingar til prosjekt. Det vil stå igjen. I tillegg har ho lagt ned ein stor innsats i saker om utdanning og kommuneøkonomi.

Følling trekk også fram samferdsleområdet, med Nasjonal transportplan, som eit av områda Navarsete har vore viktig.

– I tillegg har vi ostetollen, landbruksoppgjera og Høgskulebygget i Sogndal. Det er saker som har vore vanskeleg å få gjennomslag for, og som det er viktig å ha representantar som sit tett på, seier ho.

Meiner ho har stått på for politikken, og ikkje eiga vinning

Navarsete har fått kritikk for leiarstilen og raseriutbrot. Når partiet sjølv granske årsakene til valnederlaget i fjor haust vart leiinga trekt fram som eit svakt punkt.

Grepstad meiner Navarsete har vore ein god partileiar.

– Ho har vore ein politikar som har vore oppteken av å jobbe med sakene. Ho har kjempa for distrikta sine interesser, og har ikkje vore oppteken av eigenprofilering, men vore oppteken av å få resultat i politikken. Ho har vore ein ærleg og dyktig partileiar i den norske partileiarfloraen.

Valkommentatoren meiner partileiaren har vore utsett for enormt stort press, og er ikkje overraska over at ho til slutt har gjett opp.

– Det gledelege er at ho har stått i kampen så lenge som ho har gjort. Ho har stått på for politikken, og ikkje sin eigen posisjon.