– Fjoråret var eit greitt år økonomisk sett, men vi skulle hatt nokon tonn ekstra med morellar og bringebær. Med det som utgangspunkt så var årsresultatet i fjor heilt greitt, seier dagleg leiar for Lærdal Grønt, Harald Blaaflat Mundal, til NRK.
Verksemda fekk om lag 450.000 kroner i overskot i fjor, noko som er over 300.000 kroner lågare enn i 2013. Forklaringa ligg rett og slett i dei spesielle vêrtilhøva som råka Lærdal i periodar i 2014.
Austavind og frost
– Det rauk om lag 50 tonn med morellar med nattefrosten i mai i fjor. Vi hadde ein mindre bringebærproduksjon enn det vi kunne ønska på grunn av uttørking. Det var ein stri austavind i Lærdal i månadsvis. Det påverka volumet vårt og dermed inntektene, seier Mundal.
FROSTEN ØYDELA: Om lag 50 tonn av morellavlinga i Lærdal blei aldri noko av som ein følgje av nattefrosten i fjor vår.
Foto: Lærdal grøntTrass i redusert overskot for samvirkeselskapet Lærdal Grønt, er han på alle måtar optimist med tanke på framtida for den store landbruksnæringa i kommunen.
– Vi har solide produksjonar i botnen, særleg då poteter og gulrot. I fjor var det eit veldig bra gulrotår. Vi plantar ut mykje av både morellar og bringebær, og vi skal ha ein vekst framover på inntektssida.
- Les også:
- Les også:
Går tilbake til produsentane
Salsinntektene for Lærdal Grønt hamna på 61,6 millionar i 2014, og verksemda er blant dei 50 største verksemdene innan frukt og grønt i Norge.
– Så lenge vi klarer å halde styr på kostnadane, så skal det gå bra i åra framover også. Vi er jo eit samvirke, så overskotet skal i hovudsak gå tilbake til produsentane. Men vi må sitje att med eit såpass stort overskot at vi må klare å ta naudsynte investeringar framover, slår Mundal fast.
