Eid har Gloppen som førsteprioritet, men når dei etter alle solemerke seier nei til giftarmål i dag, frir Eid gjerne til andre.
– Vi veit at det er ein sjanse for at det blir nei i Gloppen. Då seier vi i vår innstilling at vi er positive til å snakke med andre nabokommunar om kva moglegheiter som finst, seier Eidordførar Alfred Bjørlo (V).
Formannskapet i kommunen gjekk torsdag samrøystes inn for at ein seier ja til intensjonsavtalen med Gloppen. Politikarane i nabokommunen er ikkje like positive, så når kommunestyret der samlast for å seier sitt blir det etter alt å døme nei til ein ny kommune. Framsynte politikarar på Eid har difor også sikra at dei har andre alternativ på blokka.
– Vi seier i vår innstilling at vi er positive til å snakke med andre nabokommunar om kva moglegheiter som finst. Vårt ynskjemål er å finne breiare løysingar i heile Nordfjord, seier Bjørlo.
Ingen enkel kabal
Kva kommunar som er mest aktuelle å sonderer terrenget vidare med vil ikkje Bjørlo ut med, og kva som faktisk let seg gjere er heller ikkje så lett å få oversikt over. I Selje ser ordførar Stein Robert Osdal (KrF) positivt på invitasjonen som truleg dukkar opp.
– Vi fronta dette i 2014 saman med Eid, men det er fleire kommunar som må snu haldningane sine til ein Nordfjordkommune. Vi ser positivt på å slå oss saman med Eid og andre kommunar.
Mellom dei to kommunane ligg Vågsøy, og der er stemninga litt annleis. Eit klart fleirtal av veljarane i Vågsøy sa tidlegare i år ja til å slå seg saman med Selje, men i Selje var folket negative. Og no stretar politikarane i Vågsøy også litt i mot å sjå heile Nordfjord under eitt.
– I løpet av prosessen så har det nok frå politisk hald i Vågsøy blitt meir fokus på ein kystkommune, men for all del, blir ein nordjordfkommune tema igjen, så må vi diskutere det, seier ordførar Kristin Maurstad (Ap).
I kommunestyrevedtaket frå torsdag ser dei mot kysten heller enn innover i Nordfjordlandskapet. Dei ser at det er nødvendig med eit tyngdepunkt på kysten, men Maurstad understrekar at ein ikkje har ekskludert nokon.
Bjørlo meiner det er eit stor-Nordfjord som er naturleg sidan kommunane allereie samarbeider om tenester i stor grad. For Osdal i Selje er gode alternativ velkomne på bordet, men ein ting er han klar på.
– Det som kjem opp no må vere realistisk. Då tenkjer eg at ein liten eller heile del av Nordfjord er det vi må jobbe med.