– Det er mykje å gjere her, dersom du er intelligent nok til å finne på noko.
Det seier Theo Kopperdal. Den unge årdølen fortel at han sym i bassenget så å seie kvar dag.
– Når det er fint vêr og sol er det mykje folk her. Vi har ei fotballbane rett oppi her, så då kan vi veksle på å spele fotball og å bade.
Men Kopperdal vitjar ikkje bassenget åleine. Han har fått besøk frå Ål i Buskerud. Eskil og Iver Grue nyt dagane i Årdal.
– Det er eit kjempefint anlegg. Med fint vêr har vi mykje å gjere her, og vi har det berre moro. Vi har ikkje liknande anlegg i Ål, fortel Iver.
Og Eskil seier seg einig.
– Det er fint her, stort basseng og stor sklie. I tillegg er vatnet varmt!
Badevakt Simon Lidal har ansvaret for at dei som badar i Øvre Årdal er trygge. Han kan fortelje at anlegget er populært.
– Det er mykje folk, men det er avhengig av vêret. På fine dagar er det veldig mykje folk.
Og symjarane er ei fin blanding av lokale og tilreisande.
– Det er mykje både og, men det er mest folk i helgene. Då har vi både turistar og lokale, seier Lidal.
Men badevakta meiner at endå fleire kan ta turen til badeanlegga.
– Det kan absolutt komme fleire folk, no er det klart flest born som nyttar bassenget. Vi har fleire sklier, eit stort basseng og rom for alle, fortel Lidal.